टम ह्याङ्क्सको नजरमा उनका हेर्नलायक ४ फिल्म

लसएन्जल्स - विश्वकै दर्शकका लागि टम ह्याङक्स पर्दामा आउनु सानोतिनो उत्सव सरह हुन्छ । ४० वर्षे फिल्मी करिअरमा उनले सबै विधाका फिल्ममा काम गरेका छन् जसमा एकै साल प्रदर्शनमा आएका ‘यु ह्याभ गट मेल’ र ‘सेभिङ प्राइभेट रायन’ जस्ता फिल्म पर्छन् । 

तर अस्कर विजेता टमको नजरमा उनले जम्माजम्मी ४ वटा राम्रा फिल्म खेलेका छन् । टमले ४० वर्षअघि अभिनय यात्रा सुरु गरेका थिए । ‘फिल्म कसरी बनाउने भन्ने कसैलाई पनि थाहा छैन जबकि हरकोही यसको विज्ञ भएको दाबी गर्छन् । उनले मंगलबार पिपुल म्यागजिनसँगको कुराकानीमा भनेका छन्, ‘मैले चार दर्जन बढी फिल्म बनाएको छु । जसमध्ये ४ वटा ठीकै छन् । मलाई त फिल्म बनाउनु चमत्कार जस्तै लाग्छ । एउटा सानो विचार कसरी कसरी फिल्म बन्न पुग्छ ।’

---

टम ह्याङक्सले पिपुलसँगको कुराकानीमा यी चार वटा फिल्मको नाम खुलाएका छैनन् तर विभिन्न समयमा उनले आफूले खेलेका मध्ये राम्रा फिल्मको नाम लिने क्रममा यी फिल्मका नाम चुहाएका छन् । टमका अनुसार ‘लिग अफ दियर ओन’, ‘कास्ट अवे’, ‘फरेस्ट गम्प’, ‘क्लाउड एटलस’ उनले बनाएका र खेलेका उत्कृष्ट चार फिल्म हुन् । यसमा पनि उनले अभिनेतामा दोस्रो अस्कर दिलाउने ‘फरेस्ट गम्प’लाई सबैभन्दा मनपर्ने सिनेमाको श्रेणीमा राखेका छन् ।

न्युयोर्क टाइम म्यागजिनले सर्वकालीन महान फिल्मको सूचीमा यो फिल्मको नाम नराख्दा टमले असन्तुष्टि जनाएका थिए । उनले आफूले खेलेका मध्ये रद्दी फिल्मको नाम लिनुपर्दा भने ‘एन्जल एन्ड डेमन्स’ र ‘इनफेर्नो’को नाम लिने गरेका छन् । यी दुवै फिल्म ‘दाभिन्ची कोड’का सिक्वेल थिए ।