जेम्स बोन्ड बन्न नपाएकोमा क्याथरिनलाई पछुतो

लसएन्जल्स-  अभिनेत्री क्याथरिन जेटा जोन्सले लेडी जेम्स बोन्ड बन्न नपाउनु आफ्नो अभिनय करिअरको दुःखद क्षण बताएकी छिन् । ५३ वर्षीय अभिनेत्रीले जेम्स बन्ड अभिनेता सिन कोनरीले आफूलाई जेम्स बोन्ड बनाउन निकै बल गरे पनि सफल नभएको स्मरण गर्दै पछुतो मानेकी हुन् ।

 सिन कोनरी र क्याथरिनले सन् १९९९मा रिलिज भएको ‘इन्ट्रयापमेन्ट’मा काम गरेका थिए । यही फिल्मको दौरान दुवै नजिकिएका थिए । ‘कोनरीले तिमी जेम्स बन्ड बन्न खुबै सुहाउँछ भनेर मेरा लागि जोड गरेका थिए । तर मैले त्यो मौका पाइँन । अभिनय यात्रामा यही एउटा कुरा चाहिँ मलाई खट्किन्छ,’ उनले भनिन् ।

---

डेनियल क्रेगले अन्तिम फिल्म गरेसँगै निर्माण टिम अहिले नयाँ जेम्स बन्डको खोजीमा छ । यसमा धेरैले महिलालाई जेम्स बन्ड बनाउनु पर्ने आवाज पनि उठाइरहेका छन् । तर निर्माण टिमले कुनै निधो गरिसकेको छैन । तर यो फिल्मका निर्माता मध्येका एक बारबारा ब्रोकोलीले सिरिजमा बन्डको भूमिका पुरुषले नै निर्वाह गर्ने स्पष्ट पारेका थिए ।