दयाको जन्मदिनमा बिहेका कथामा उनका दुई फिल्मको प्रदर्शन

काठमाडौं - दयाहाङ राईले वैशाख १ मा जन्मदिन मनाउँछन् । भोजपुरमा जन्मिएका दयाहाङ आउँदो वैशाखबाट सम्भवतः ४३ लाग्छन् । तर यो सालको जन्मदिन उनका लागि विशेष हुँदैछ । किनकि यो साल उनका दुई फिल्म एकै दिन रिलिज हुँदैछन् ।

निर्माताहरूको दाबी अनुसार आउँदो नयाँ वर्षमा दयाहाङ अभीनित ‘जारी’ र ‘बिहे पास’ प्रदर्शन हुँदैछन् । रोचक कुरा के छ भने नामैले यी दुवै फिल्म विवाहसँग सम्बन्धित छन् ।  ‘बिहे पास’ले विवाहको कथा वरिपरि फिल्म घुमेको संकेत गर्छ भने ‘जारी’ अर्काकी श्रीमती लैजाँदा भोग्नुपर्ने जरिवानाको अर्थ बुझाउँछ । 

---

दुवै निर्माताले एउटै मितिमा फिल्म हालेपछि दयाहाङमाथि कुन फिल्मलाई साथ दिने नैतिक संकट उत्पन्न भएको छ । ‘जारी’ दयाको ‘कबड्डी’ सिरिजका लेखक उपेन्द्र सुब्बाको निर्देशनमा डेब्यू फिल्म हो । यसैले दयाको पहिलो सहानुभूति यही फिल्मप्रति रहने अनुमान गर्न सकिन्छ । 

यो थाहा हुँदाहुँदै ‘बिहे पास’ निर्माताले यही मिति फिल्म प्रदर्शन गर्ने निर्णय गर्नु अलिक अनौठो छ । यति मात्र होइन त्यही मितिमा बाँकी दुई फिल्म पनि रिलिज हुने चर्चा छ । यही मितिमा ‘नाइँ नभन्नू ल ६’ आउँदैछ भने भने ‘प्रसाद २’ले पनि यही मितिमा आउने घोषणा गरिसकेको छ ।