टोरन्टोमा छानियो सगरमाथा आरोही लाक्पा शेर्पामाथि बनेको डकुमेन्ट्री

काठमाडौँ  - १० पटककी सगरमाथा आरोही लाक्पा शेर्पामाथि बनेको डकुमेन्ट्री ‘माउन्टेन क्विन : दि समिट अफ लाक्पा शेर्पा’ टोरन्टो इन्टरनेसनल फिल्म फेस्टिभलमा छनौट भएको छ । फेस्टिभलले बुधबार डकुमेन्ट्रीतिरको लाइनअप सार्वजनिक गरेको थियो । ‘माउन्टेन क्विन’ दुई दुई पटक यही विधामा अस्करमा मनोनयनमा परेकी लुसी वाकरले तयार गरेकी हुन् । 

अशिक्षित लाक्पाले अमेरिका उड्नु अघि जीविकाका लागि दस पटकसम्म सगरमाथा आरोहण गरेकी थिइन् । १० पटकसम्म सगरमाथा आरोहण गर्ने उनी पहिलो महिला हुन् । बुधबार टम पावर्सले डकुमेन्ट्रीको लाइनअप सार्वजनिक गर्दै दुनियाँले चाल नपाएका ठूला स्टार डकुमेन्ट्रीमा हुने र तिनको बारेमा फिल्म हेरिसकेपछि मात्र चाल पाइने बताउँदै लाक्पाको चर्चा गरेका थिए । ‘जस्ता कि माउन्टेन क्विन,’ उनले सम्बोधनका क्रममा भनेका थिए, ‘ सगरमाथा आरोही लाक्पा शेर्पा, म दाबाका साथ भन्न सक्छु कि फिल्मको प्रदर्शनपछि उनी दर्शकको जीवनमा ठूलो स्टारको रुपमा यादगार रहनेछिन् ।’

---

निर्देशक लुसी वाकरले पनि एकल महिलाको रुपमा छोरीहरू हुर्काउन उनले गरेको संघर्ष प्रेरणादायी रहेको बताएकी छिन् ।टोरन्टोको ४८ औँ संस्करण आउँदो सेप्टेम्बर ७ देखि १७ सम्म क्यानडामा सुचारु हुनेछ । फिचर फिल्म तर्फको लाइनअप सोमबार सार्वजनिक गरिएको थियो । जसमा पहिलो चरणमा ६० वटा फिल्मको नाम घोषणा गरिएको छ ।