काठमाडौँ– निर्वाचन आयोगले आफूले प्रस्ताव गरेकै मिति अनुसार सरकारले निर्वाचनको मिति घोषणा गरे निर्वाचन गराउन सबै पूर्वतयारी भैसकेको जनाएको छ ।

‘सरकारको निर्णय आउनसाथ निर्वाचनमा होमिन्छौं । यसका लागि थप कानुन, नियम आवश्यक पर्दैन,’ आयोगका एक पदाधिकारीले भने, ‘आयोगले सरकारलाई ६ पृष्ठ लामो सुझाव पठाएको छ । सरकारबाट अनुमोदन प्राप्त हुनासाथ हामी अघि बढ्छौं ।’

---

स्थानीय तहको निर्वाचन व्यवस्थापनका लागि कानून बमोजिम आयोगलाई सामान्यतयाः १२० दिन निर्वाचन अवधि आवश्यक पर्ने भएपनि आगामी स्थानीय तहको निर्वाचनलाई लक्षित गरी आयोगले मतदाता नामावली संकलन, मतदानस्थलहरुको पुनरावलोकन र निर्धारण तथा निर्वाचन सम्पन्न गर्न आवश्यक पूर्व तयारीका काम सम्पन्न भैसकेकाले स्थानीय तहमा निर्वाचन सम्पन्न गर्न आयोग तयारी अवस्थामा रहेको आयोगको भनाई छ ।  

यसअघि  २०७४ वैशाख ३१ गते, असार १४ गते र असोज २ गते गरी तीन चरणमा सम्पन्न स्थानीय तहको निर्वाचनबाट निर्वाचित पदाधिकारीहरुको पदावधि २०७९ जेठ ५ मा समाप्त हुने भएकोले सो अगावै स्थानीय तहको निर्वाचन सम्पन्न गर्न सकिने आयोगले सरकारलाई बुझाएको ६ पृष्ठ लामो सुझावमा उल्लेख छ । 

‘आयोगको संवैधानिक एवम् कानूनी दायित्व भएको हुँदा २०७९ जेष्ठ ४ गते वुधवारका दिन स्थानीय तहको निर्वाचन एकै चरणमा गर्ने गरी स्थानीय तह निर्वाचन ऐन, २०७३ को दफा ४ को उपदफा (१) बमोजिम निर्वाचनको मिति तोक्न नेपाल सरकारलाई परामर्श दिएको’ आयोगले जनाएको छ । 

स्थानीय तह निर्वाचनको मिति तय गर्न आज मन्त्रिपरिषद् बैठक बोलाइएको छ । 

यो पनि पढ्नुहोस्: 

स्थानीय निर्वाचनका लागि आयोगले माग्यो १२ अर्ब रुपैयाँ बजेट