माच्छापुच्छ्रे बैंकमा जोडियो 'नेपाल पे', भुक्तानीमा झन् सहज

काठमाडौँ - माछापुच्छ्रे बैंक लिमिटेडले आफ्नो मोबाइल बैंकिङ एपमा नेपाल पे क्यूआर इन्टिग्रेटेड गरेको छ । बैंकले आफ्ना ग्राहकलाई नेपाल पे क्यूआर स्क्यान गर्न तथा त्यसमार्फत अनलाइन भुक्तानी गर्न सक्ने सुविधाका लागि मोबाइल बैंकिङ एपमा यो सेवा थप गरेको हो ।

यससँगै बैंकका ग्राहकले नेपाल पे क्यूआरमा रहेका विभिन्न मर्चेन्ट र पेमेन्ट गेटवेमा सहजै अनलाइन भुक्तानी गर्न सक्नेछन् । साथै बैंकले अब नेपाल पे क्यूआरका लागि आफैँ मर्चेन्ट थप गर्ने काम समेत गर्ने बताइएको छ । माछापुच्छ्रे नेशनल पेमेन्ट स्विचमा आवद्ध हुने र नेपाल पे क्यूआर प्रयोग गर्ने पहिलो बैंक समेत हो । ६ लाख मोबाइल बैंकिङ प्रयोगकर्ता रहेको यो बैंकले अहिलेसम्म छ हजार ५ सय मर्चेन्ट तयार पारिसकेको छ ।

---

नेपाल पे क्यूआर एनसीएचएलले नेपाल क्यूआर स्ट्यान्डर्डमा तयार पारेको तथा सञ्चालनमा ल्याएको पूर्वाधार हो । जुन नेशनल पेमेन्ट स्विचकै अङ्गको रुपमा रहेको छ । नेपाल क्यूआरका लागि हिमालयन बैंक, एनआईसी एसिया बैंक, कामना सेवा विकास बैंक र फोकसवान सोलुसन प्रालिले यसअघि नै मर्चेन्ट तयार पार्न थालिसकेका छन् । अन्य बैंक समेत यसका लागि प्रक्रियामै रहेको एनसीएचएलले जनाएको छ ।

एमबीएलको मोबाइल बैंकिङ एपमा क्यूआरको सक्षमता र व्यापारी क्यूआार प्राप्त गर्नाले खुद्रा स्तरमा डिजिटल लेनदेनमा थप वृद्धि हुने अपेक्षा गरिएको छ, जुन बैंकको लागि सधैं मुख्य फोकस भएको छ। एमबीएलले देशैभर फैलिएका आफ्ना १६४ शाखा, ८ एक्सटेन्सन काउन्टर, १६५ शाखा रहित बैंकिङ सेवा र २०३ एटिएम मार्फत आफ्ना ग्राहकलाई सेवा दिँदै आएको छ ।