काठमाडौँ : प्रश्न खेपेका न्यायाधीशले संवैधानिक इजलास छाड्ने वा नछाड्ने टुंगो सोमबार लाग्दैछ । सर्वोच्च अदालतले ती न्यायाधीशको विषयमा आज बेलुका आदेश जारी गर्ने भएको हो  ।

प्रतिनिधि सभा विघटनसम्बन्धी मुद्दाको सुनुवाइ गर्न गठिन संवैधानिक इजलास विषयवस्तुमा प्रवेश गर्न नपाउँदै न्यायाधीशमाछि प्रश्न उठेको थियो । आइतबारको सुनुवाइमा पनि कानुन व्यवसायीले न्यायाधीश बमकुमार श्रेष्ठ र तेजबहादुर केसीमाथि प्रश्न उठाएका हुन् ।

---

सर्वोच्च अदालतको संवैधानिक इजलासमा शुक्रबारबाट सुनुवाइ भइरहेको छ  । कानुन व्यवसायी गोविन्द बन्दीलगायतले न्यायाधीशमाथि प्रश्न उठाएपछि आइतबारको सुनुवाइ यही मुद्दामा केन्द्रित भएको थियो । इजलासले यही विषयमा लामो बहस गराएपछि बहसको टुंगो सोमबार लाग्ने भएको हो ।

यसअघि शुक्रबार पनि इजलासका न्यायाधीशमाथि प्रश्न उठेको थियो । रिट निवेदकतर्फका न्यायाधीशमाथि प्रश्न उठाएका थिए । न्यायाधीश श्रेष्ठको इजलासले तत्कालीन नेकपा दुई टुक्रा पारेको भन्दै उनी विघटनको मुद्दामा बस्न नहुने जिकिर कानुन व्यवसायीहरूको थियो । अर्कोतिर इजलासका अर्का न्यायाधीश केसीमाथि पनि यही विषयलाई आधार बनाएर कानुन व्यवसायीले प्रश्न उठाएका थिए  । नेकपा नामको मुद्दाले मुलुकलाई यो अवस्थामा ल्याएको जिकिर गर्दै कानुन व्यवसायीले उक्त फैसलाको पुनरावेदन अस्वीकर गर्नेमा न्यायाधीश केसीसमेत रहेको प्रष्ट पारिरहेका छन् ।

निष्ठामाथि प्रश्न उठेपछि न्यायाधीशद्वय श्रेष्ठ र केसीले इजलासबाट बाहिरिएलान् ? उक्त प्रश्नको जवाफ सर्वोच्च अदालतले आजै दिने भएको छ । तर, इजलासबाट बाहिरिने कि नबाहिरिने भन्ने निर्णय तिनै न्यायाधीशले गर्ने प्रधानन्यायाधीश चोलेन्द्र शमशेर जबराले आइतबार नै संकेत गरेका थिए । न्यायाधीशमाथि उठेका प्रश्नमाथि बहस सकिएपछि आइतबार उनले भनेका थिए,‘अब श्रीमानले के भन्नुहुन्छ ?’