काठमाडौँ - सर्वोच्च अदालतका प्रधानन्यायाधीश चोलेन्द्र शमशेर राणाको राजीनामा माग गर्दै कानुन व्यवसायीले आइतबार पनि प्रदर्शन गरेका छन् । सर्वोच्च परिसरमा व्यवसायीले आइतबार पनि प्रधानन्यायाधीश राणाको राजीनामा माग गर्दै विरोध प्रदर्शन गरेका हुन् ।

कात्तिक पहिलो हप्तादेखि नेपाल बार एशोसिएसनले प्रधानन्यायाधीश राणाविरुद्ध राजीनामा माग गर्दै आन्दोलन चर्काउँदै आएको छ । यस्तै बार महासचिव लीलामणि पौडेलले प्रधानन्यायाधीश राणाको बहिर्गमनका लागि आवश्यक पर्ने सबै आन्दोलन गर्ने बताएका छन् ।

---

नियमित विरोध प्रदर्शन, सर्वोच्चदेखि बालुवाटारसम्म न्याय मार्चपास गर्दा पनि प्रधानन्यायाधीश राणाले राजीनामा नदिएपछि बार पदाधिकारी झन् आक्रोशित भएका छन् ।

‘प्रधानन्यायाधीश राणाको बहिगर्मनका लागि जे जे गर्नुपर्ने हो, त्यो आन्दोलन गर्छौ’, उनले इकागजसँग भने, ‘यसका लागि दलहरुलाई ज्ञापनपत्र बुझाउनदेखि थप आन्दोलनका कार्यक्रम गर्छौ ।’