क्रिकेट विश्वकप छनोट नेट टिभी एपमा नि:शुल्क प्रशारण हुने

काठमाडौँ- जिम्बाब्वेमा जुन १८ देखि जुलाई ९ तारिखसम्म आयोजना हुने आईसीसी पुरुष क्रिकेट विश्वकप छनोटका खेलहरू नेट टिभी एपले नेपालमा निःशुल्क प्रशारण गर्ने भएको छ ।

जोहरा इन्टरनेशनल प्रालिले नेपालको भूभाग भित्र विश्वकप छनोटको डिजिटल स्ट्रिमिङका लागि आधिकारिक रूपमा मिडिया अधिकार प्राप्त गरेको छ । स्टार इन्डिया प्रालिमार्फत आधिकारिक सब इजाजतपत्रदाता जोहराले एड प्याड प्रालिलाई विशेष मार्केटिङ र प्रसारण अधिकार प्रदान गरेको छ ।

---

एडप्याडले यस प्रतियोगितालाई नेट टिभी एप र वेबसाइटमा नि:शुल्क प्रसारण गर्ने घोषणा गरेको छ । प्रतियोगिताका सबै ३४ खेलहरू नेट टिभी एप र वेबसाइटमा प्रसारण गरिनेछ ।

विश्वकप छनोटका लागि समूह ‘ए’ मा रहेको नेपालले पहिलो खेल जिम्बाब्वेविरुद्ध जुन १८, दोस्रो खेल अमेरिकाविरुद्ध जुन २०, तेस्रो खेल वेस्ट इन्डिजविरुद्ध जुन २२ तथा अन्तिम खेल नेदरल्यान्ड्सविरुद्ध जुन २४ मा खेल्ने तालिका रहेको छ ।