भावनात्मक तथा हतारमा लिइएको सन्यास फिर्ता लिन तमिमसँग आग्रह

काठमाडौँ- बंगलादेश क्रिकेट बोर्ड (बीसीबी) का अध्यक्ष नजमुल हसनले आकस्मिक रुपमा अन्तर्राष्ट्रिय क्रिकेटबाट सन्यासको घोषणा गरेका बंगलादेशका कप्तान तमिम इक्बाललाई उक्त निर्णय फिर्ता लिन आग्रह गरेका छन् ।

हसनका अनुसार तमिमले भावनामा आएर तथा हतारमा सन्यासको घोषणा गरेको बताउँदै उनीसँग सन्यास फिर्ता लिन आग्रह गरेका क्रिकबजले जनाएको छ ।

---

भारतमा आयोजना हुने एकदिवसीय विश्वकप आउन ३ महिनाभन्दा कम समय बाँकी छँदै तमिमले अन्तर्राष्ट्रिय क्रिकेटबाट सन्यास लिएका हुन् ।

विश्वकपमा उनकै कप्तानीमा बंगलादेशले विश्वकप खेल्ने अपेक्षा गरिएको थियो ।

बीसीबीका अध्यक्ष हसनले तमिमको घोषणा आश्चर्यजनक तथा निराशाजनक रहेको समेत बताए ।

तर हसनले तमिमले औपचारिक रुपमा सन्यास लिन बाँकी रहेको तथा उनलाई आफ्नो निर्णय फिर्ता लिन आग्रह गरिएको जनाए ।