काठमाडौँ- श्रीलंकामा बिहीबारबाट सुरु हुने एसीसी पुरुष इमर्जिङ टिम्स एसिया कपका लागि नेपाली टिममा अफ-स्पिनर मौसम (श्याम) ढकालले स्थान पाएका छन् ।

सन्दीप लामिछाने, करण केसी, दिपेन्द्रसिं ऐरी, आरिफ शेख, ज्ञानेन्द्र मल्लजस्ता मुख्य खेलाडीहरु टिममा छैनन् । अझ टिममा लेग स्पिनर सन्दीप नभएपछि मौसमले टिममा मौका पाएका हुन् ।

---

यसअघि राष्ट्रिय टिममा परे पनि मौसमले डेब्यू भने गर्न पाएका थिएनन् । गत फेब्रुअरी २७ देखि मार्च ६ सम्म युनाइटेड अरब इमिरेट्स (यूएई) मा भएको आईसीसी क्रिकेट विश्वकप लिग-२ अन्तर्गतको त्रिकोणात्मक सिरिजमा उनी टिममा परेका थिए ।

तर अदालतले सन्दीपलाई विदेश जान दिने आदेश दिएपछि घाइते भएको भन्दै मौसमलाई घर फर्काइएको थियो । उनको स्थानमा सन्दीपलाई टिममा राखिएको थियो । सिरिजमा नेपाल, यूएई र पीएनजीको सहभागिता रहेको थियो ।

श्रीलंकामा हुने इमर्जिङ टिम्स एसिया कपका लागि भने सन्दीप टिममा छैनन् र मौसम विकल्पको रुपमा हुन सक्छ ।

इमर्जिङ टिम्स एसिया कपका लागि नेपाल समूह ‘बी’ मा परेको छ । यस समूहमा युएई ‘ए’, पाकिस्तान ‘ए’ र भारत ‘ए’ पनि रहेका छन् । समूह ‘ए’ मा भने श्रीलंका ‘ए’, बंगलादेश ‘ए’, अफगानिस्तान ‘ए’ र ओमान ‘ए’ छन् ।

नेपालले पहिलो खेल १४ जुलाईमा पाकिस्तान, दोस्रो खेलमा १७ जुलाईमा भारत तथा समूह चरणको अन्तिम खेलमा १९ जुलाईमा युएईको सामना गर्ने तालिका रहेको छ ।