अस्ट्रेलियन ब्याटर हेड टेस्ट वरीयताको शीर्ष स्थाननजिक

काठमाडौँ- अस्ट्रेलियन ब्याट्सम्यान ट्राभिस हेड आईसीसीअन्तर्गतको टेस्ट वरीयताको ब्याटिङतर्फ शीर्ष स्थान नजिक पुगेका छन् ।

आईसीसीले सार्वजनिक गरेको नयाँ वरीयताअनुसार बायाँ हाते ब्याट्सम्यान हेड ब्याटिङतर्फ दोस्रो स्थानमा पुगेका छन् ।

---

उनी करियरकै उच्च स्थानमा पुगेका हुन् । हेड शीर्ष स्थानका लागि नयाँ प्रतिस्पर्धी बनेका हुन् ।

इंग्ल्यान्डविरुद्धको एशेज सिरिजमा २९ वर्षीय हेडले ४४.३३ को औसतमा कुल २ सय ६६ रन बनाईसकेका छन् ।

चार महिनादेखि टेस्ट क्रिकेट नखेलेका न्यूजिल्याण्डका केन विलियमसन टेस्ट वरीयताको शीर्ष स्थानमा यथावत छन् । आईसीसीले यसअघि सार्वजनिक गरेको वरीयताअनुसार विलियमसन एक स्थान माथि उक्लिएका थिए ।

पाकिस्तानका बाबर आजम तीन स्थान सुधार गर्दै तेस्रो स्थानमा पुगेका छन् । पछिल्लो वरीयतामा पाचौँ स्थानमा रहेका इंग्ल्यान्डका ब्याट्सम्यान जो रूट भने एक स्थान तल झर्दै छैटौँ स्थानमा पुगेका छन् ।

अस्ट्रेलियन ब्याटर स्टिभ स्मिथ र मार्नस लाबुसेन दुई-दुई स्थान तल झर्दै चौँथो र पाचौँ स्थानमा पुगेका छन् ।