कुशल भुर्तेल भन्छन्: कप्तान रोहितले मलाई बलिङमा विश्वास गर्दैनन्

काठमाडौँ- नेपाली राष्ट्रिय क्रिकेट टिमका ओपनर ब्याटर कुशल भुर्तेलले बलिङमा कप्तान रोहित पौडेलले आफूलाई विश्वास नगर्ने खुलासा गरेका छन् ।

श्रीलंकामा जारी एसीसी इमर्जिङ टिम्स एसिया कपअन्तर्गत युनाइटेड अरब इमिरेट्स (यूएई) ‘ए’ विरुद्ध म्यान अफ द म्याच घोषित भएपछि प्रतिक्रिया दिने क्रममा कुशलले आफूलाई रोहितले बलिङमा विश्वास नगर्ने खुलासा गरेका हुन् ।

---

समूह ‘बी’ अन्तिम खेलमा नेपालले यूएईलाई ३ विकेटले पराजित गर्दा कुशलले ६ विकेट लिनुका साथै ७१ रनको योगदान गरेका थिए ।

उनले नेपालका लागि ६ विकेट लिने क्रममा १० ओभरमा ४० रन मात्रै खर्चिएका थिए ।

‘आजको खेलमा रोहितले मलाई विश्वास गरेर बलिङ गर्ने अवसर दिए । मैले नेटमा नियमित बलिङ गर्ने भए पनि अन्य समयमा रोहितले मलाई बलिङमा विश्वास गर्दैनन्,’ कुशलले भने ।