सन्दीपआवद्ध सर्रे तथा दिपेन्द्रको मोन्टरियल विजयी

काठमाडौँ- ग्लोबल टी-ट्वान्टी क्यानाडा (लिग) मा सन्दीप लामिछानेआवद्ध सर्रे जागुअर्स र दिपेन्द्र सिंह ऐरीआवद्ध मोन्टरियल टाइगर्सले जित हात पारेका छन् ।

सर्रेले ३ खेलमा पहिलो जित हात पार्दा मोन्टरियलको यो लगातार तेस्रो जित हो ।

---

सर्रेले पहिलो जित हात पार्ने क्रममा टोरन्टो नेसनल्सलाई २० रनले पराजित गर्‍यो ।

१८ ओभरमा सिमित भएको खेलमा सर्रेले दिएको १ सय ४२ रनको लक्ष्य पछ्याएको टोरन्टोले ९ विकेट गुमाएर १ सय २१ रनमात्र जोड्यो ।

टोरन्टोका लागि कोलिन मुनरोले सर्वाधिक ४३ रन बनाए । सर्रेका लागि म्याथ्यु फोर्डले ४ तथा सन्दीप लामिछानेले २ विकेट हात पारे ।

यसअघि टस हारेर पहिले ब्याटिङ गरेको सर्रेले निर्धारित १८ ओभरमा ६ विकेट गुमाएर १ सय ४१ रन जोड्यो । उसका लागि कप्तान इफ्तिकार अहमदले ४७ रन बनाए ।

यता मोन्टरियलले भने भान्कोभर नाइट्सलाई ६ विकेटले पराजित गर्‍यो । मोन्टरियलले १ सय ५० रनको लक्ष्य १८ ओभर १ बलमा ४ विकेट गुमाएर पूरा गर्‍यो ।

मोन्टरियलका लागि शेरफान रुथरफोर्डले अविजित ८४ तथा दिपेन्द्र सिंह ऐरीले अविजित २२ रन जोडे ।

यसअघि टस हारेर पहिले ब्याटिङ गरेको भान्कोभरले निर्धारित २० ओभरमा ४ विकेटको क्षतिमा १ सय ४९ रन बनायो । भान्कोभरका लागि फकर जमानले ७३ रन बनाए ।

मोन्टरियलका लागि कार्लोस ब्रेथवेटले २ तथा दिपेन्द्र सिंह ऐरीले १ विकेट लिए ।