क्रिकेट विश्वकपः भारत र पाकिस्तानबीचको खेल तोकिएको दिन नहुने सम्भावना

काठमाडौँ- भारतमा यसै वर्ष हुने एकदिवसीय क्रिकेट विश्वकपअन्तर्गत भारत र पाकिस्तानबीचको खेल तोकिएको दिन नहुने सम्भावना बढेको छ ।

अक्टोबर १५ मा गुजरातको अहमदाबादमा हुने भनिएको खेल नवरात्रीको पहिलो दिन परेको छ ।

---

तर गुजरातको सुरक्षा एजेन्सीहरूले भारत र पाकिस्तानबीचको खेल सार्न बीसीसीआईलाई सल्लाह दिएको इंडियन एक्सप्रेसले जनाएको छ ।

नवरात्रीको पहिलो दिन गुजरातमा ठूलो सहभागिताका साथ रातको समयमा गरबा मनाइने गरिन्छ । जसका कारण सुरक्षा चुनौती थपिने गरिएको छ ।

आईसीसीले गत महिना सार्वजनिक गरेको विश्वकपको तालिकामा करिब १ लाख क्षमताको नरेन्द्र मोदी स्टेडियममा चार उत्कृष्ट खेलहरू छन् ।

उक्त स्टेडियममा साविक विजेता इङ्गल्याण्ड र न्यूजिल्याण्डबीचको उद्घाटन खेलसँगै भारत र पाकिस्तान, इंग्ल्याण्ड र अष्ट्रेलिया तथा विश्वकपको फाइनल हुने तालिका छ ।