सन्दीपआवद्ध सर्रे फाइनलमा, दिपेन्द्रको मोन्टरियल क्वालिफायर खेल्ने

काठमाडौँ- सन्दीप लामिछानेआवद्ध सर्रे जागुआर्स ग्लोबल टी-ट्वान्टी क्यानाडाको फाइनलमा प्रवेश गरेको छ ।

शुक्रबार राति भएको पहिलो क्वालिफायरमा भान्कोभर नाइट्सलाई ३८ रनले पराजित गर्दै सर्रे फाइनलमा प्रवेश गरेको हो ।

---

जितका लागि १ सय ४० रनको लक्ष्य पछ्याएको भान्कोभरले १६ ओभर ४ बलमा सबै विकेट गुमाउँदै १ सय १ रनमात्र बनाउन सकेपछि सर्रे फाइनलमा प्रवेश गरेको हो ।

भान्कोभरका लागि फावियन एलेनले सर्वाधिक २७ रन बनाए । सर्रेका म्याथ्यु फोर्डले सर्वाधिक ४ तथा डिलोन हेयलिगरले २ विकेट हात पार्दा सन्दीपले एक विकेट लिए ।

यसअघि टस हारेर पहिले ब्याटिङ गरेको सर्रेले निर्धारित २० ओभरमा ९ विकेट गुमाएर १ सय ३९ रन बनाउँदा कप्तान इफ्तिकार अहमदले सर्वाधिक ३६ रनको योगदान गरे ।

भान्कोभरका लागि जुनैद सिद्दिकीले सर्वाधिक ४ विकेट हात पारे ।

सर्रेसँग पराजित भान्कोभरले अब फाइनल प्रवेशका लागि मोन्टरियल टाइगर्सविरुद्ध दोस्रो क्वालिफायर खेल्ने छ ।

शुक्रबार राति नै भएको एलिमिनेटर खेलमा मोन्टरियलले ब्राम्पटन उल्भ्सलाई ९ विकेटले पराजित गर्‍यो ।

टस हारेर पहिले ब्याटिङ गरेको ब्राम्पटनले निर्धारित २० ओभरमा सबै विकेट गुमाएर १ सय ४ रन बनायो । जवाफमा मोन्टरियलले १ सय ५ रनको लक्ष्य १४ ओभर २ बलमा एक विकेट गुमाएर पूरा गर्‍यो ।

मोन्टरियलको जितमा दिपेन्द्र सिंह ऐरीले एक विकेट हात पारे ।