दिपेन्द्रआवद्ध मोन्टरियल फाइनलमा, सन्दीपको सर्रेविरुद्ध खेल्ने

काठमाडौँ- नेपाली राष्ट्रिय क्रिकेट टिमका अलराउन्डर दिपेन्द्र सिंह ऐरीआवद्ध मोन्टरियल टाइगर्स ग्लोबल टी-ट्वान्टी क्यानाडाको फाइनलमा प्रवेश गरेको छ ।

शनिबार राति भएको दोस्रो क्वालिफायरमा भान्कोभर नाइट्सलाई १ विकेटले पराजित गर्दै मोन्टरियल फाइनलमा प्रवेश गरेको हो ।

---

मोन्टरियलले अब उपाधिका लागि सन्दीप लामिछानेआवद्ध सर्रे जागुआर्सको सामना गर्नेछ । फाइनल आज राति हुँदैछ ।

शनिबार राति भान्कोभरले दिएको १ सय ३८ रनको लक्ष्य मोन्टरियलले १९ ओभर ३ बलमा ९ विकेट गुमाएर पूरा गर्‍यो ।

मोन्टरियलको जितमा शेरफाने रुथरफोर्डले सर्वाधिक ४८ तथा दिपेन्द्र सिंह ऐरीले २५ रन जोडे । भान्कोभरका जुनैद सिद्दिकीले सर्वाधिक ४ विकेट हात पारे ।

यसअघि टस हारेर पहिले ब्याटिङ गरेको भान्कोभरले निर्धारित २० ओभरमा ६ विकेट गुमाएर १ सय ३७ रन बनायो । भान्कोभरका लागि मोहम्मद रिजवानले ३९ रन तथा कोर्बिन बोचले ३६ रन जोडे ।

मोन्टरियलका लागि अब्बास अफ्रिदीले सर्वाधिक ५ विकेट हात पारे ।