वेस्ट इन्डिजले जित्यो भारतविरुद्धको टी-ट्वान्टी सिरिज

काठमाडौँ- आयोजक वेस्ट इन्डिजले भारतविरुद्धको पाँच खेलको टी-ट्वान्टी सिरिज जितेको छ ।

आइतबार राति अमेरिकामा भएको पाँचौँ तथा अन्तिम खेल ८ विकेटले जित्दै वेस्ट इन्डिजले सिरिजमाथि ३-२ ले कब्जा जमाएको हो ।

---

यसअघि दुवै टोलीले समान २-२ खेल जितेका थिए ।

आइतबार राति १ सय ६६ रनको लक्ष्य वेस्ट इन्डिजले १८ ओभरमा केवल दुई विकेट गुमाएर पूरा गर्‍यो ।

वेस्ट इन्डिजका लागि ब्रान्डन किंगले ५५ बलमा अविजित ८५ रनको योगदान गरे ।

यसअघि टस जितेर पहिले ब्याटिङ गरेको भारतले निर्धारित २० ओभरमा ९ विकेटको क्षतिमा १ सय ६५ रन जोड्यो ।

भारतका लागि सुर्यकुमार यादवले सर्वाधिक ६१ रन बनाए । वेस्ट इन्डिजका रोमारियो शेफर्डले सर्वाधिक ४ विकेट हात पारे ।