न्यूजिल्यान्डमाथि यूएईको कीर्तिमानी जित

काठमाडौँ- युनाइटेड अरब इमिरेट्स (यूएई) ले टेस्ट राष्ट्र न्यूजिल्यान्डमाथि ऐतिहासिक जित हात पारेको छ ।

शनिबार राति दुबईमा भएको तीन खेलको टी-ट्वान्टी सिरिजको दोस्रो खेलमा यूएईले न्यूजिल्यान्डलाई ७ विकेटले पराजित गरेको हो ।

---

यूएईले न्यूजिल्यान्डमाथि क्रिकेटको कुनैपनि फर्म्याटमा पराजित गरेको यो पहिलो पटक हो ।

यससँगै सिरिज १-१ को अवस्थामा पुगेको छ । पहिलो खेल न्यूजिल्यान्डले जितेको थियो ।

शनिबार राति १ सय ४३ रनको लक्ष्य यूएईले १५ ओभर ४ बलमै केवल ३ विकेट गुमाएर पूरा गर्‍यो ।

यूएईलाई कीर्तिमानी जित दिलाउन कप्तान मुहम्मद वासिमले सर्वाधिक ५५ रन तथा आशिफ खानले ४८ रनको योगदान गरे ।

न्यूजिल्यान्डका लागि टिम साउथी, मिचेल सान्टनर र कायल जेमिसनले एक-एक विकेट हात पारे ।

यसअघि टस हारेर पहिले ब्याटिङ गरेको न्यूजिल्यान्डले निर्धारित २० ओभरमा ८ विकेट गुमाएर १ सय ४२ रन जोड्यो ।

न्यूजिल्यान्डका लागि मार्क चापम्यानले सर्वाधिक ६३ रन बनाए । यूएईका लागि आयान अफजल खानले सर्वाधिक ३ तथा मुहम्मद जवादुल्लाहले २ विकेट हात पारे ।