आयरल्यान्डलाई हराउँदै भारतले जित्यो टी-ट्वान्टी सिरिज

काठमाडौँ- भारतले दोस्रो खेलमा आयरल्यान्डलाई हराउँदै तीन खेलको टी-ट्वान्टी सिरिज एक खेल अगावै जितेको छ ।

आइतबार राति आयरल्यान्डको डब्लिनमा भएको टी-ट्वान्टी सिरिजको दोस्रो खेलमा भारतले आयरल्यान्डलाई ३३ रनले पराजित गरेको हो ।

---

टस हारेर पहिला ब्याटिङ गरेको भारतले निर्धारित २० ओभरमा ५ विकेट गुमाउँदै १८५ रन जोडेको थियो । भारतका लागि रुतुराज गायकवाडले सर्वाधिक ५८, सन्जु स्यामसन ४० र रिन्कु सिंहले ३८ रन बनाए ।

आयरल्यान्डका लागि ब्यारी म्याककार्थीले सर्वाधिक २ विकेट लिए ।

जवाफमा ब्याटिङमा उत्रेको आयरल्यान्डले निर्धारित २० ओभरमा ८ विकेट गुमाउँदै १५२ रन मात्र जोड्यो । ओपनर एन्ड्रयू बालबर्नीले आयरल्यान्डका लागि ७२ रन जोडे पनि जित दिलाउन सकेनन् ।

भारतका लागि कप्तान जसप्रित बुमराह, प्रसिध कृष्णा र रवि बिश्नोईले २-२ विकेट लिए ।

२१ बलमा ३८ रन जोडेका रिन्कु सिंह म्यान अफ दि म्याच भए ।

यसअघि पहिलो खेल भारतले २ रनले जितेको थियो । सिरिज जितिसकेको भारतले तेस्रो तथा अन्तिम खेल बुधबार खेल्नेछ ।