अस्ट्रेलियाले जित्यो दक्षिण अफ्रिकाविरुद्धको सिरिज

काठमाडौँ- अस्ट्रेलियाले घरेलु टोली दक्षिण अफ्रिकाविरुद्धको तीन खेलको टी-ट्वान्टी सिरिज एक खेल अगावै जितेको छ ।

डर्बनमा शुक्रबार राति भएको दोस्रो खेल ८ विकेटले जित्दै अस्ट्रेलियाले सिरिजमाथि कब्जा जमाएको हो । यसअघि पहिलो खेल अस्ट्रेलियाले १ सय ११ रनले जितेको थियो ।

---

शुक्रबार राति दक्षिण अफ्रिकाले दिएको १ सय ६५ रनको लक्ष्य अस्ट्रेलियाले १४ ओभर २ बलमा २ विकेट गुमाएर पूरा गर्‍यो ।

अस्ट्रेलियाको जितमा कप्तान मिचेल मार्सले सर्वाधिक ७९ रन तथा म्याथ्यु शर्टले ६६ रन जोडे ।

यसअघि टस हारेर पहिले ब्याटिङ गरेको दक्षिण अफ्रिकाले निर्धारित २० ओभरमा ८ विकेट गुमाउँदै १ सय ६४ रन बनायो । कप्तान आइडेन मारक्रामले सर्वाधिक ४९ रन बनाए ।

अस्ट्रेलियाका लागि सिन अबोट र नाथन एलिसले समान ३-३ विकेट हात पारे ।