अफगानिस्तानलाई हराउँदै श्रीलंका एसिया कपको सुपर फोरमा

काठमाडौँ- अफगानिस्तानलाई पराजित गर्दै श्रीलंका एसीसी एसिया कपको सुपर फोरमा प्रवेश गरेको छ ।

समूह ‘बी’ अन्तर्गत मंगलबार राति पाकिस्तानको लाहोरमा सम्पन्न खेलमा अफगानिस्तानलाई २ रनले पराजित गर्दै श्रीलंका समूह विजेताको रुपमा अघिल्लो चरणमा प्रवेश गरेको हो ।

---

यसअघि श्रीलंकाले बंगलादेशलाई पराजित गरेको थियो । अफगानिस्तानलाई पराजित गरेको बंगलादेश पनि समूहको उपविजेताको रुपमा सुपर फोरमा प्रवेश गरेको छ । दुवै खेलमा पराजय भोगेको अफगानिस्तान भने प्रतियोगिताबाट बाहिरिएको छ ।

समूह ‘ए’ बाट भने नेपाल बाहिरिदा भारत र पाकिस्तान भने सुपर फोरमा प्रवेश गरिसकेका छन् ।

मंगलबार राति २ सय ९२ रनको लक्ष्य पछ्याएको अफगानिस्तानले ३७ ओभर ४ बलमा सबै विकेट गुमाएर २ सय ८९ रनमात्र बनाउन सक्यो ।

अफगानिस्तानका लागि मोहम्मद नावीले ६५ रन तथा कप्तान हसमातुल्लाह शाहिदीले ५९ रन बनाए । श्रीलंकाका लागि कासुन राजिथाले सर्वाधिक ४ विकेट हात पारे ।

यसअघि टस जितेर पहिले ब्याटिङ गरेको श्रीलंकाले निर्धारित ५० ओभरमा ८ विकेट गुमाएर २ सय ९१ रन बनायो । श्रीलंकाका लागि कुशल मेन्डिसले ९२ रनको योगदान गरे ।

अफगानिस्तानका लागि गुल्बदिन नइबले सर्वाधिक ४ विकेट हात पारे ।