दक्षिण अफ्रिकाविरुद्ध अस्ट्रेलिया १२३ रनले विजयी

काठमाडौँ- घरेलु टोली दक्षिण अफ्रिकाविरुद्धको पाँच खेलको एकदिवसीय सिरिजको दोस्रो खेलमा अस्ट्रेलियाले शानदार जित हात पारेको छ ।

ब्लोमफोन्टेनमा शनिबार राति सम्पन्न खेलमा अस्ट्रेलियाले दक्षिण अफ्रिकालाई १ सय २३ रनले पराजित गरेको हो ।

---

यससँगै अस्ट्रेलियाले सिरिजमा २-० को अग्रता लिएको छ । यसअघि पहिलो खेल अस्ट्रेलियाले ३ विकेटले जितेको थियो ।

शनिबार राति ३ सय ९३ रनको विशाल लक्ष्य पछ्याएको दक्षिण अफ्रिकाले ४१ ओभर ५ बलमा सबै विकेट गुमाएर २ सय ६९ रनमात्र जोड्न सक्यो ।

दक्षिण अफ्रिकाका लागि हेनरिक क्लासेन र डेभिड मिलरले समान ४९-४९ रन बनाए । अस्ट्रेलियाका एडम जाम्पाले सर्वाधिक ४ विकेट लिए ।

यसअघि टस हारेर पहिले ब्याटिङ गरेको अस्ट्रेलियाले निर्धारित ५० ओभरमा ८ विकेट गुमाएर ३ सय ९२ रन बनायो ।

अस्ट्रेलियाका लागि मार्नस लाबुसेनले सर्वाधिक १ सय २४ रन तथा डेभिड वार्नरले १ सय ६ रन बनाए । दक्षिण अफ्रिकाका लागि ताबरेज शम्सीले सर्वाधिक ४ विकेट लिए ।