एसिया कपः बंगलादेशसँग हार्‍यो भारत

काठमाडौँ- एसीसी एसिया कप क्रिकेट प्रतियोगिताअन्तर्गत फाइनलमा प्रवेश गरिसकेको भारतले पहिलो पराजय भोगेको छ ।

शुक्रबार राति श्रीलंकामा भएको सुपर फोरको अन्तिम खेलमा बंगलादेशले भारतलाई ६ रनले पराजित गरेको हो ।

---

यससँगै प्रतियोगिताबाट बाहिरिसकेको बंगलादेशले अन्तिम खेलमा जित हात पार्दा फाइनल खेल्नुअघि भारतले भने पराजय भोगेको हो । भारतले आइतबार श्रीलंकाविरुद्ध फाइनल खेल्दैछ ।

शुक्रबार राति २ सय ६६ रनको लक्ष्य पछ्याएको भारतले ४९ ओभर ५ बलमा सबै विकेट गुमाएर २ सय ५९ रनमात्र जोड्न सक्यो ।

भारतका लागि ओपनर शुवमन गिलले ८ चौका र ५ छक्काको मदतमा १ सय ३३ बलमा १ सय २१ रनको योगदान गरेपनि जितका लागि पर्याप्त भएन ।

बंगलादेशका लागि मुस्ताफिर रहमानले सर्वाधिक ३ तथा तान्जिम हसन साकिव र महेदी हसनले २-२ विकेट हात पारे ।

यसअघि टस हारेर पहिले ब्याटिङ गरेको बंगलादेशले निर्धारित ५० ओभरमा ८ विकेट गुमाएर २ सय ६५ रन जोड्यो । बंगलादेशका लागि कप्तान शाकिब अल हसनले ८० तथा टोउहिड हृदोयले ५४ रनको योगदान गरे ।

भारतका लागि शार्दूल ठाकुरले ३ तथा मोहम्मद शामीले २ विकेट हात पारे ।