क्रिकेट विश्वकप छनोटः ओमान सेमिफाइनल नजिक पुग्दा बहराइनको पहिलो जित

काठमाडौँ- आईसीसी टी-ट्वान्टी क्रिकेट विश्वकप एसिया क्षेत्रिय छनोटअन्तर्गत ओमान र बहराइनले जित हात पारेका छन् ।

समूह ‘ए’ अन्तर्गत कीर्तिपुरस्थित त्रिवि क्रिकेट मैदानमा मंगलबार भएको खेलमा ओमानले सिंगापुरलाई २२ रनले पराजित गरेको हो ।

---

यसअघि सोमबार ओमानले मलेसियालाई ३२ रनले पराजित गर्दा सिंगापुरले नेपालसँग ८ विकेटको पराजय भोगेको थियो ।

लगातार दुई खेलमा जित हात पारेको ओमान सेमिफाइनल नजिक पुगेको छ । मंगलबार नै हुने खेलमा नेपालले मलेसियालाई पराजित गरेको खण्डमा नेपाल र ओमान अन्तिम चारमा प्रवेश गर्नेछन् ।

मंगलबारको खेलमा ओमानले दिएको १ सय ७५ रनको लक्ष्य पछ्याएको सिंगापुरले निर्धारित २० ओभरमा ८ विकेट गुमाएर १ सय ५२ रनमात्र जोड्यो ।

यता समूह ‘बी’ अन्तर्गत मुलापानी अन्तर्राष्ट्रिय क्रिकेट मैदानमा भएको खेलमा बहराइनले हङकङलाई २० रनले पराजित गर्‍यो ।

सोमबार बहराइनले यूएईसँग ५ विकेटको पराजय भोगेको थियो भने हङकङले कुवेतलाई १६ रनले पराजित गरेको थियो ।