खैरो हेरोइन र चरेससहित दुईजना पक्राउ

कैलाली- धनगढीमा लागूऔषध खैरो हेरोइन र चरेससहित दुई जना पक्राउ परेका छन्।

लागूऔषधको कारोबार भैरहेको भन्‍ने गोप्य सूचनाको आधारमा जिल्ला प्रहरी कार्यालय कैलालीबाट खटिएको प्रहरी टोलीले धनगढीबाट खैरो हेरोइन र चरेससहित दुई जनालाई पक्राउ गरेको हो । 

---

पक्राउ पर्नेमा बझाङ बुंङ्गल नगरपालिका-८ घर भई धनगढी उपमहानगरपालिका-५ तारानगर डेरा गरी बस्‍ने २८ वर्षीय प्रेम ऐडीको कोठाबाट २ किलो ५०० ग्राम चरेस र धनगढी-२ पुरानो भन्सार रोड बस्‍ने २७ वर्षीय गणेश विष्टको घरबाट १० ग्राम खैरो हेरोइन बरामद गरिएको जिल्ला प्रहरी कार्यालय कैलालीका प्रवक्ता डिएसपी बेदप्रकाश जोशीले बताए ।

पक्राउ परेकाहरूबारे थप अनुसन्धान भैरहेको डिएसपी जोशीले जानकारी दिए ।