अमेरिकन पेस्तोलसहित धनुषाबाट तीन भारतीय पक्राउ

जनकपुरधाम । धनुषाबाट प्रहरीले अमेरिकन पेस्तोलसहित तीनजना भारतीय नागरिकलाई पक्राउ गरेकाे छ । प्रहरीका अनुसार पक्राउ पर्नेमा भारत विहारको मुजफ्फरपुर–७ साहेबगंज बस्ने २९ वर्षीय राहुल रञ्जन, २० वर्षीय उज्वल कुमार र २६ वर्षीय संजय कुमार रहेका छन् ।

सशस्त्र प्रहरी निरीक्षक दिलेन्द्र खत्रीको कमाण्डमा खटेको प्रहरी टोलीले सोमबार धनुषाको विदेह नगरपालिका–१ महिनाथपुरस्थित सीमानाकामा जनकपुरधामबाट भारततर्फ जाँदै गरेको बि आर ०६ एपी ३००८ नम्बरको मारुती सुजुकी कारलाई चेकजाँच गर्दा उनीहरूलाई पक्राउ गरेकाे हाे ।

---

प्रहरीका अनुसार तिनीहरूले कारको अगाडिको बायाँ साईडको सिटमुनिबाट मेड इन युएसए लेखिएको ७.६५ राउण्ड एक थान लोड भएको पेस्तोल लुकाएर राखेकाे अवस्थामा बरामद गरिएकाे छ । हतियारसहित पक्राउ परेका उनीहरुलाई आवश्यक कारवाहीका लागि इलाका प्रहरी कार्यालय खजुरीमा पठाइएको छ ।