खैरो हेरोइनसहित तीन जना पक्राउ

मकवानपुर- जिल्ला प्रहरी कार्यालय मकवानपुरले लागूऔषध खैरो हेरोइनसहित तीन जनालाई पक्राउ गरेको छ ।

मकवानपुरको अस्थायी प्रहरी पोष्ट हटियाबाट खटिएको प्रहरी टोलीले हेटौडा उपमहानगरपालिका १६ हटिया त्रिशुले स्थित धरान चतारा सडक खण्डबाट एक व्यक्तिलाई नियन्त्रणमा लिएको हो ।

---

शंकास्पद रूपमा चिसापानी चोकबाट हर्नामाडी तर्फ पैदल हिँडिरहेको अवस्थामा हेटौडा उपमहानगरपालिका १६ चिसापानी बस्‍ने ३४ वर्षीय विकराज विकलाई नियन्त्रणमा लिएको हो । उनको साथबाट लागूऔषध खैरो हेरोइन जस्तो देखिने खैरो धुलो पदार्थ ४० मिली ग्राम फेला बताइएको छ ।

जिल्ला प्रहरी कार्यालय मकवानपुरबाट खटिएको प्रहरी टोलीले हेटौडा उपमहानगरपालिका १० मित्र मार्ग स्थित सडकमा शंकास्पद रुपमा बसिरहेको अवस्थामा हेटौडा उपमहानगरपालिका १० बस्ने ३७ वर्षीय रन्जित आले मगरलाई पनि नियन्त्रणमा लिएको छ । 

निजले लुकाई छिपाई राखेको अवस्थामा लागूऔषध खैरो हेरोइन जस्तो देखिने खैरो धुलो पदार्थ ४० मिली ग्राम फेला परेको प्रहरीले जनाएको छ ।

यसैगरी प्रहरी चौकी हेटौंडा बसपार्कबाट खटिएको प्रहरी टोलीले हेटौडा उपमहानगरपालिका १० बसपार्कबाट अर्का एक जनालाई नियन्त्रणमा लिएको छ । 
हेटौडा उपमहानगरपालिका २ बस्‍ने ४८ वर्षीय उज्वलकृष्ण मानन्धरलाई प्रहरीले नियन्त्रणमा लिएको हो । मानन्धरको साथबाट लागूऔषध खैरो हेरोइन जस्तो देखिने १०० मिली ग्राम खैरो धुलो पदार्थ फेला परेको हुँदा उक्त लागूऔषधसहित नियन्त्रणमा लिई थप अनुसन्धान भईरहेको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक टेक बहादुर कार्कीले बताए ।