सव-इन्जिनियरमाथि एक लाख रकम घूस नपाएपछि अधुरो भुक्तानी दिएको आरोप

बैतडी- डिभिजन वन कार्यालय बैतडीका सब-इन्जिनियर महानन्द पन्तले सेवाग्राहीबाट माग गरेको एक लाख रकम घूस नपाएपछि अधुरो भुक्तानी गरेको आरोप लागेको छ ।

जिल्लाको डिलाशैनी गाउँपालिका वडा नम्बर ४ स्थित मठैराज मन्दिरमा आवासगृह निर्माणमा लागि प्रदेश सरकारबाट आएको १० लाख रकममा एक लाख घूस दिन नसकेपछि अधुरो भुक्तानी भएको उपभोक्ता समिति अध्यक्ष पन्तले बताए । 

---

उनले भने, 'मन्दिरको भएको र देउताको कसम खाँदै एक रुपैयाँ पनि हिनामिना नगर्ने सोचले काम गरेका हौं । सोही अनुसार स्टिमेटमा भएका सबै काम पूरा गरेका छौं । काम सम्पन्न भए पश्चात् डिभिजन प्रमुख र प्राविधिक आएर जाँच गर्दा ९ लाख ७० हजारको काम भएको भन्दै सोही अनुसारको कागजात तयार गरे । भुक्तानीका लागि आउनु भनियो र डिभिजन वन कार्यालयमा जाँदा हामीलाई प्राविधिकले विभिन्न बाहानमा ३ दिन अल्मल्याए । अन्ततः एक लाख रकम दिए मात्रै भुक्तानी गर्ने बताएपछि ८० हजारको चेक र ५ हजार नगद दिएर घर फर्कियौं । मैले चेक दिए पनि त्यस खातामा पैसा छैन भने ।' 

सम्झौताका बखत पहिलो किस्ता ३ लाख २० हजार र अन्तिममा ४ लाख ५२ हजार ८ सय ८० रुपैयाँ गरी ७ लाख ७२ हजार ८ सय ८० रुपैयाँ मात्रै खातामा प्राप्त भएको बताए ।

उपभोक्ता समिति अध्यक्ष पन्तले भने, 'घूस माग्ने प्राविधिकले आफूलाई दिएको ८० हजारको चेक नसाटिएमा पूरा भुक्तानी नगर्ने चेतावनी दिएका थिए । सोही अनुसार झन्डै २ लाख रकम कम दिएकै छाडे ।'

स्टमेट अनुसार काम नभएका योजनामा रकम घट्न सक्ने डिभिजन वन अधिकृत भीमप्रसाद कँडेलले बताए । डिलाशैनीसहित केही आयोजनामा कम रकम भुक्तानी भएको उनको भनाइ छ । उनले भने,‘फिल्डमा गएको बेला भीडमा बढी मूल्यांकन गरिए पनि पछि फोटो हेर्दा कम काम भएको पाइयो । त्यसैले रकम घटेको हो,’ उनले भने ।

कर्मचारीले घूस मागेको विषय प्रमाणित भएमा सम्बन्धित व्यक्तिलाई तत्काल कारबाही गरिने प्रमुख जिल्ला अधिकारी सुरेश पन्थीले बताए । न्युज कारखाना