लागूऔषधसहित दुई पक्राउ

मकवानपुर - लागूऔषध कारोबारमा संलग्न रहेको आरोपमा दुई जनालाई मकवानपुर प्रहरीले नियन्त्रणमा लिएको छ । उनीहरूलाई लागूऔषधसहित पक्राउ गरेको प्रहरीले जनाएको छ ।

नाईट्रोभेट ६०० ट्याब्लेट, डाईजेपाम ९३० एम्पुल लागूऔषधसहित उनीहरु पक्राउ परेका हुन् । पक्राउ पर्नेहरुमा मोरङ बिराटनगर महानगरपालिका-१५ घर भई पर्सा वीरगंज बस्ने २२ वर्षीय रंजित शर्मा र जटाशंकर सोनार रहेको जिल्ला प्रहरी कार्यालय मकवानपुरले जनाएको छ । जिल्ला प्रहरी कार्यालय मकवानपुरका प्रहरी नायब उपरीक्षक टेकबहादुर कार्कीका अनुसार उनीहरुलाई विशेष सूचनाको आधारमा जिल्ला प्रहरी कार्यालय मकवानपुरबाट खटिएको प्रहरी टोलीले पक्राउ गरेको हो ।

---

बिहीबार बिहान वीरगंजबाट हेटौंडातर्फ आउँदै गरेको ना ६ ख ८४२५ नम्वरको यात्रुबाहक बसलाई हेटौंडा–१५ रातोमाटे चेकपोष्टस्थित सडकखण्डमा चेकजाँच गर्दा उक्त परिमाणमा लागूऔषध बरामद गरि नियन्त्रणमा लिएको प्रहरीले आज जानकारी गराएको हो । बसमा सवार रंजित शर्माले ल्याएको २० किलोको चामलको बोराभित्र उक्त परिमाणको लागूऔषध बरामद भएको कार्कीले बताए ।

शर्माले बरामद लागूऔषध जटाशंकर सोनारले पठाएको बताएका थिए । ना २६ प ७९८० नम्वरको मोटरसाइकलमा चितवनतर्फ जाँदै गरेकोमा हेटौंडा नारायणगढ सडकखण्डको लोथरस्थित सडक किनारमा बसिरहेको अवस्थामा सोनारलाई पक्राउ गरिएको प्रहरी नायव उपरीक्षक कार्कीले जानकारी दिए ।

बरामद लागूऔषध र मोटरसाइकलसहित पक्राउ परेका उनीहरुमाथि आवश्यक अनुसन्धानका साथै कानुनी प्रकृया अगाडि बढाइएको जिल्ला प्रहरी कार्यालय मकवानपुरले जनाएको छ ।