भारतीय विदेश सचिव आउनु अघि प्रधानसेनापति थापा र भारतीय राजदूतबीच भेट

काठमाडौं : भारतीय राजदूत विनय मोहन क्‍‍वात्राले प्रधानसेनापति पूर्णचन्द्र थापासँग भेट गर्दै दुई मुलुकबीचको सम्वन्धबारे समिक्षा गरेका छन् । उनीहरूबीच बुधबार जंगी अड्डामा भेट भएको हो । भेटवार्तामा दुई मुलुकबीचको सुरक्षादेखि अन्य समसामयिक विषयमा छलफल भएको नेपाली सेनाले जनाएको छ ।

भारतीय स्थल सेनाध्यक्ष मनोजमुकुन्द नरवाणेले नेपालको भ्रमण गरेपछि प्रधानसेनापति थापा र राजदुत क्‍वात्राबीच यो पहिलो भेट हो । यो भेटमा भ्रमणको समयमा भएका सहकार्यका विषयमा समीक्षा भएको थियो । दुई पक्षीय हित तथा पारस्परिक सम्बन्धका विषय र सहयोगका क्षेत्रबारेमा छलफल भएको हो । यस प्रकारको नियमित भेट र वार्ताले दुई मुलुकबीचको आपसी सम्बन्धलाई सुमधुर एवं प्रगाढ बनाउन थप मद्दत पुग्‍ने नेपाली सेनाले जनाएको छ । 

---

सत्तारुढ दलभित्र किचलो चलिरहँदा उनीहरू जंगी अड्डामा भेटवार्ता गरिरहेका थिए । यद्यपी सेनापतिसँगको भेट पहिले नै तय थियो । नेपाल र भारतबीचको सीमा विवाद टुंगो लगाउन चाँडै औचापरिक बैठक हुने भनिएको अवस्थामा यो भेट भएको छ । सुरक्षा संयन्त्रबाट धेरै विषय फुक्दै गएको अवस्थमा सेनाले सहकार्य थप बढाउन सक्नेछ । 

भारतीय विदेश सचिव हर्षवद्र्धन श्रृंगलाको नेपाल भ्रमणसमेत हुने भनिएको समयमा राजदूतले सेनाप्रमुखलाई भेटेका हुन् । नेपाल र भारतबीच दुईपक्षीय भइरहँदा भारतीय राजदूतले प्रधानसेनापति थापालाई भेट्नु अर्थपूर्ण छ । 

यसैबीच मंगलबार साँझ चिनियाँ राजदूत होउ यान्छीले प्रधानमन्त्री केपी शर्मा ओलीलाई भेटेको चर्चा सेलाउन नपाउँदै अर्का छिमेकी राजदूतले प्रधानसेनापतिसँग भेटवार्ता गरेका हुन् ।