'नेपालमा कोभिडको नयाँ भेरियन्ट भाइरस भेटिएको छैन'

काठमाडौँ : बेलायतको ट्याबलोइट पत्रिका 'डेली मेल' ले नेपालमा नयाँ भेरियन्ट फैलिएको खबर सार्वजनिक गरेपछि यसविषयले चर्चा पाएको छ ।  नेपाल सरकारले भने कोभिड-१९ को कुनै पनि नयाँ भाइरस फेला नपरेको र यो खबर झुट भएको दाबी गरेको छ । 

नेपालमा भारत र बेलायतमा भेटिएको भाइरसमात्रै नेपालमा फेला परेको छ । स्वास्थ्य तथा जनसंख्या मन्त्रालयका सह-प्रवक्ता डा. समीर कुमार अधिकारीका अनुसार दुई साताअघि भारतमा फेला परेको भाइरस मात्र नेपालमा देखिएको हो ।

---

'पछिल्लो समय नेपालमा देखिएका संक्रमितममा भारतमा देखा परेको भाइरस पुष्टि भएको छ,' उनी भन्छन,'यसबारे अन्तरराष्ट्रिय विश्‍व स्वास्थ्य संगठन (आइएचआर)लाई जानकारी गराइसकेको छौं । यदि नयाँ भाइरस देखिएको भए त्यसमा दर्ता भइसकेको हुन्थ्यो ।' उनले नेपालमा अन्य कुनै पनि नयाँ प्रकृतिको भाइरस फेला नपरेको बताए । उनले‍ सञ्‍चारमाध्यममा अफवाह समाचार फैलाइएको बताए ।

बेलायतस्थित नेपाली राजदूतावासले नेपालको नाम जोडिएर भाइरस फैलिएको विषयको समाचार बेलायती सञ्‍चार माध्यममा आएपछि आपत्ति जनाएको छ । नेपालस्थित स्वास्थ्य मन्त्रालयको पत्रको दूतावासले पर्खिरहेको दूतावासकी प्रवक्ता रोशन खनालले इकागजसँग भनिन् ।

बेलायत सरकारको कोभिड 'फोकल पर्सन'लाई यस विषयमा नेपाली दूतावासले ध्यानाकर्षण गराइसकिएको खनालको भनाइ छ ।  कोभिडसँग सरोकार राख्‍ने सरकारी निकाय र अन्य संस्थालाई पनि नेपालमा नयाँ प्रकृतिको भाइरस नरहेकाे सन्देश पुर्‍याएको पनि उनले बताइन् ।

'ट्याबलोइट पत्रिकाले समाचार प्रकाशन गरेको छ, बेलायत जस्तो मुलुकमा पुष्टि नभएको समाचार प्रकाशन भएकोप्रति दुखी छौँ,' उनले भनिन,' समाचार संस्थालाई हामी यसबारेमा सोध्‍ने छौँ । चित्तबुझ्दो जवाफ नआए हामी प्रेस काउन्सिल र अदालत पनि जानेछौँ ।' 

नेपालस्थित विश्‍व स्वास्थ्य संगठनले कोभिडको नयाँ भाइरस फेला नपरेको जनाएको छ । डेल्टा,कप्पा र अल्फा जस्ता भाइसर मात्र देखापरेको छ । पछिल्लो समय तीव्र रुपमा 'डेल्टा' नामक भाइरस फैलिएको छ ।

 

WHO is not aware of any new variant of SARS-CoV-2 being detected in Nepal. The 3⃣confirmed variants in circulation are: Alpha (B.1.1.7), Delta (B.1.617.2) and Kappa (B.1.617.1). The predominant variant currently in circulation in Nepal is Delta (B.1.617.2).@mohpnep @PandavRajesh

— WHO Nepal (@WHONepal) June 3, 2021