चीनले थप १० लाख सिनोभ्याक र ५० लाख युआनको मेडिकल सहायता दिने

काठमाडौँ– चीनले कोभिड–१९ नियन्त्रण र यसविरुद्धको लडाइँमा नेपाललाई थप सहयोग घोषणा गरेको छ । स्वास्थ्य राज्यमन्त्री उमेश श्रेष्ठसँगको भेटमा नेपालका लागि चिनियाँ राजदूत होउ यान्छीले चीन सरकारले थप १० लाख डोज सिनोभ्याक खोप अनुदानमा र ५० लाख युआन बराबरको मेडिकल सामग्री अनुदान उपलब्ध गराउने जानकारी गराएको स्वास्थ्य मन्त्रालयले जनाएको छ ।

५० लाख युआन बराबरको मेडिकल सामग्री र लजिस्टिक सहायता कोभिड–१९ को सम्भावित तेश्रो लहरसँग लड्नका लागि उपलब्ध गराउन लागेको मन्त्रालयले जनाएको छ । 

---

त्यस्तै चीनले नेपाली सेनालाई ३ लाख थप खोप अनुदान दिने भएको छ । नेपालको खोप अभियानमा सबैभन्दा ठूलो योगदान चीनबाट प्राप्त खोपको रहेको छ । अहिलेसम्म वितरितमध्ये आधा अर्थात् ८३ लाख चिनियाँ खोप वितरण भएको छ । यसका अतिरिक्त, चीनले यसअघि अनुदान घोषणा गरेको १६ लाख खोप अक्टोबर २०, २२ र २३ मा प्राप्त हुने स्वास्थ्य सचिव रोशन पोखरेलले जानकारी दिए ।