दाहाल-माधवले देउवालाई भने: यथास्थितीमा एमसीसी पास गर्न सकिँदैन

काठमाडौं -  सत्ता साझेदार नेकपा माओवादी केन्द्रका अध्यक्ष पुष्पकमल दाहाल र नेकपा (एकीकृत समाजवादी) केन्द्रका अध्यक्ष माधवकुमार नेपालले अमेरिकी मिलेनियम च्यालेन्ज कर्पोरेसन (एमसीसी) परियोजना यथास्थितीमा संसद्‌बाट पास गर्न सरकारलाई सहयोग नगर्ने बताएका छन् । 

आज प्रधानमन्त्री  शेरबहादुर देउवालाई भेटेर पूर्वप्रधानमन्त्रीसमेत रहेका दुई नेताले अहिलेकै अवस्थामा एमसीसी पास गर्न सकिने पक्षमा आफूहरू नरहेको बताएका हुन् ।  

---

भेटमा प्रधानमन्त्री देउवाले एमसीसी संसद्‌बाट अनुमोदन गराउन आग्रह गरेपछि उनीहरूले त्यसलाई अस्वीकार गरेका हुन् ।  यता दाहाल र नेपालले भने एमसीसीबारे जनस्तरबाट उठेका सवालहरू सम्बाेधन हुनुपर्ने जवाफ दिएका थिए । त्यस्तै उनीहरूले यथास्थितिमै एमसीसी पारित गराउन नसकिने भन्दै अमेरिकासँग थप समय लिनुपर्नेमा जाेड दिएका थिए ।

प्रधानमन्त्री देउवाले भने फेब्रुअरी २८ भित्र एमसीसी पारित गर्ने विषय आफ्नो प्राथमिकता रहेको स्पष्ट बताएका थिए । बालुवाटार स्रोतका अनुसार देउवाले संसद्‌मा एमसीसी टेबुल गरिनुपर्ने र सबै दलले आफ्नो धारण त्यही राख्नुपर्ने बताएका थिए । 

पछिल्लो समय एमसीसीको विषयलाई लिएर गठबन्धनमा तनाव बढ्दो छ । जसकारण गठबन्धनमा रहेका दलहरु विभाजित भएका छन् । हालै प्रधानमन्त्री देउवा र माओवादी अध्यक्ष दाहालले एमसीसीलाई पठाएको पत्र सार्वजनिक भएपछि नेपाली राजनीतिमा तरंग पैदा भएकाे छ ।