जापानी राजदूतले गरे सभामुख सापकोटासँग बिदाइ भेट

काठमाडौं : नेपालका लागि जापानी राजदूत मासामिची साइगोले सभामुख अग्‍निप्रसाद सापकोटासँग आज बिदाइ भेट गरेका छन् । कार्यकाल सकेर स्वदेश फर्कन लागेका राजदूत साइगोले सिंहदरबारस्थित सभामुखको कार्यकक्षमा बिदाइ भेट गरेका हुन् । 

भेटमा सभामुख सापकोटाले नेपाल र जापानबीच ६५ बर्ष लामो मैत्रिपूर्ण सम्बन्ध सँधै सुमधुर रहेको बताए । उनले कोभिड-१९ का कारण मानव जातिको सभ्यता र अस्तित्वमा सिर्जना भएको चुनौतीमाथि मानव जातिको जित सुरु भएको बताउँदै जापानमा आजै देखि कोभिड-१९ विरुद्ध खोप कार्यक्रम सुरु भएकोमा खुसी व्यक्त गरे । 

---

जापानले नेपालको  शिक्षा, स्वास्थ्य, कृषि लगायतका क्षेत्रमा गरिरहेको सहयोगप्रति आभार व्यक्त गर्दै सभामुख सापकोटाले नेपाली कामदारका लागि जापानले उपलब्ध गराएको रोजगारीको अवसरका लागि धन्यवाद ज्ञापन गरे । उनले समय प्रतिकुल भए पनि कार्यकाल सफलतापूर्वक सम्पन्‍न गरेकोमा राजदूत साइगोलाई बधाइ ज्ञापन गरे । 

भेटमा राजदूत साइगोले नेपाल बसाइका क्रममा भएको सहयोप्रति आभार प्रकट गर्दै यसपछि आउने राजदूतले पनि यस्तै सहयोग पाउने आशा व्यक्त गरे । साइगोले यसअघि राष्ट्रपति विद्यादेवी भण्डारी र  प्रधानमन्त्री केपी शर्मा ओलीसँग पनि बिदाइ भेट गरेका थिए ।