चीनले आफ्नो खोप लगाउनेलाई मात्र भीसा दिने

काठमाडौँः चीनले आफ्नो देशमा उत्पादित कोभिड–१९ विरुद्धको खोप लगाउनेलाई मात्र भीसा दिने भएको छ । काठमाडौँस्थित चिनियाँ दूतावासले विज्ञप्ति जारी गर्दै भीसाका लागि आवेदन दिदाँ नै चीनमा बनेको कोभिड–१९ विरुद्धको खोप लगाएको प्रमाणपत्र समेत पेश गर्नुपर्ने नियम लागू गरेको जनाएको छ । 

आवेदन र तिनका परिवारहरूले काम, व्यवसाय वा पर्यटकीय प्रयोजनले चीनको भ्रमण गर्नुपर्दा चीनमा बनेको खोप लगाएको प्रमाणपत्रबाहेक अन्य कागजात भने महामारी अघिकै आवश्यकता अनुसारको हुने भनेको छ । 

---

भीसा दिनका लागि आवश्यक पूर्व शर्तमा अब औपचारिक रूपमै चीनमा बनेको खोप लगाउनुपर्ने व्यवस्था समावेश भएको छ ।

यसका अतिरिक्त चीनले अत्यावश्यक मानवीय आवश्यकताका आधारमा दिइने भीसा सेवाको दायरालाई विस्तार समेत गरेको छ । चीनियाँ नागरिकका विदेशमा रहेका परिवार वा विदेशी नागरिकका चीनियाँ आफन्त वा श्रीमान्/श्रीमती, छोराछोरी र नजिकका नातेदार (दाजुभाइ र दिदीबहिनी, हजुबा/आमा वा नाति/नातिना) भेटघाट, पुनर्मिलन, दाहसंस्कार वा गम्भीर बिरामीहरूलाई भेट्नका लागि भीसा जारी गर्ने व्यवस्था गरिएको छ । 

एशिया–प्रशान्त इकोनोमिक कोअपरेसनको वैधानिक ट्राभल कार्ड भएकाहरूले आमन्त्रण गर्ने निकायको आमन्त्रण पत्रसहित ‘एम’ भीसाका लागि आवेदन गर्न सक्नेछन् ।

चीन भ्रमण गर्दा अझै पनि न्यूक्लीक एसिड परिक्षण र इमियुनोग्लोबुलिट एन्टीबडी परिक्षणको नेगेटीभ सर्टिफिकेट अनिवार्य र चीनमा प्रवेश गरिसकेपछि क्वारेन्टीन सम्बन्धी नियम पालना गर्नुपर्ने चिनियाँ दूतावासले उल्लेख गरेको छ ।