प्राज्ञिक विद्यार्थी परिषद्‍ले ११ हिमाली जिल्लाहरूमा शैक्षिक सामग्री वितरण गर्ने

काठमाडौँ- प्राज्ञिक विद्यार्थी परिषद् नेपाल हिमाली जिल्लाहरूमा पनि सक्रिय भएको छ । परिषदले ११ हिमाली जिल्लाहरूमा शैक्षिक सामग्रीहरू वितरण गर्ने भएको छ ।

शुक्रबार काठमाडौँमा पत्रकार सम्मेलन गरेर परिषद्ले कक्षा ११ र १२ मा अध्ययनरत १८ सय १० जना विद्यार्थीहरूलाई ३२ लाख २७ हजार मूल्य बराबरको शैक्षिक सामग्री वितरण गर्न लागेको जानकारी दिएको हो । परिषद्को सेवाकार्यअन्तर्गत शैक्षिक सामग्री वितरण कार्यक्रम २०७९ मा सिन्धुपाल्चोक, दोलखा, रसुवा, बझाङ, ताप्लेजुङ, मनाङ, मुस्ताङ, गोरखा, मुगु, डोल्पा र हुम्ला जिल्लामा शैक्षिक सामग्री वितरण गर्ने भएको हो ।

---

पत्रकार सम्मेलनमा बोल्दै प्राज्ञिक विद्यार्थी परिषद्का राष्ट्रिय संगठन सचिव नारायणप्रसाद ढकालले यो वर्ष मात्रै नभएर विगत २७ वर्षदेखि नै परिषद्‍ले विद्यार्थीलक्षित शैक्षिक सामग्रीहरु वितरण गर्दै आएको जानकारी दिए ।​

उनले निःस्वार्थ रूपले विद्यार्थीहरूलाई सहयोग गर्ने परिषद्को मुख्य उद्देश्य रहेको भन्दै भूकम्प र कोरोना पीडितलाई पनि सहयोग गरेको बताए ।