जलविद्युत् उत्पादन एकतिहाइ मात्रै

काठमाडौं - देशको विद्युत् जडित क्षमता करिब २२ सय मेगावाट । सुख्खायामको सुरुवातसँगै नदीहरूमा पानीको वहाव कम हुँदा जलविद्युत् उत्पादन ८ सय मेगावाटमा सीमित भएको छ । यो जलाशययुक्त कुलेखानीबाहेकको हो । 

प्राधिकरणका प्रवक्ता सुरेशबहादुर भट्टराईका अनुसार बिजुली उत्पादनमा कमी आएपछि विशेष गरी बीरगञ्ज र भैरहवा औद्योगिक कोरिडरमा बिहान र बेलुकी गरी आठ घण्टासम्म आपूर्ति कटौती गरिएको छ । ‘कहिलेकाहीं यी औद्योगिक कोरिडरहरूमा दैनिक तीन, चार घण्टा मात्रै आपूर्ति कटौती भएको छ,’ भट्टराईले इकागजसँग भने, ‘पूर्वमा खासै समस्या छैन ।’

---

उनका अनुसार भारतको ऊर्जा विनिमिय (आईईएक्स) मा बिडिङमा नपरेको बेला पूर्वको औद्योगिक कोरिडरमा विद्युत् आपूर्ति कमी हुने गरेको छ । ‘नेपालको आफ्नै उत्पादन एक तिहाईमा झरेको छ,’ उनले भने, ‘काबेली कोरिडरमा २ सय मेगावाट रहेकोमा अहिले मुश्किलले ३६ मेगावाट मात्र उत्पादन भइरहेको छ ।’

प्राधिकरणले आज सार्वजनिक गरेको तथ्यांकअनुसार प्रणालीमा उच्चतम विद्युत् माग (पिक डिमाण्ड) १६८३ मेगावाट छ । ऊर्जा मागका हिसाबले प्रणालीमा क्ुल २ करोड ९५ लाख ७१ हजार युनिट छ । 

प्राधिकरणको आफ्नै विद्युत् गृहबाट ६० लाख ३ हजार, निजी क्षेत्रबाट ९२ लाख ४८ हजार, प्राधिकरणका सहायक कम्पनीबाट ३१ लाख ३५ हजार, भारतबाट आयात ९२ लाख ४८ हजार आपूर्ति भइरहेको प्राधिकरणले जनाएको छ । कुल ऊर्जा मागमा ९ लाख ५० हजार युनिट बिजुली बराबरको लोडसेडिङ गरिएको छ । 

देशको एकमात्र जलाशययुक्त विद्युत् गृह कुलेखानी पहिलो, दोस्रो र तेस्रो गरी कुल १०६ मेगावाट छ । तर प्रणाली सन्तुलनका लागि मात्र आवश्यक परेको बेला सञ्चालन गर्ने गरिएको भट्टराईले बताए ।