बालुवाटारबाटै यसरी उद्घाटन गर्दैछन् प्रधानमन्त्रीले माथिल्लो तामाकोसी

काठमाडौँ : सरकारी निवास बालुवाटारमै बसेर प्रधानमन्त्री केपी शर्मा ओलीले आज अपरान्ह चार बजे माथिल्लो तामाकोसीको पहिलो युनिट (७६ मेगावाट) को उद्घाटन गर्दैछन् ।

आयोजना स्रोतका अनुसार प्रधानमन्त्री ओलीले वालुवाटरमा बन्दोबस्त गरिएको एटा स्वीच थिच्‍नेछन् । उनले उक्त स्वीच थिचेपछि दोलखाको गोंगरस्थित विद्युत् गृहमा रहेको कम्प्युटरले कमाण्ड गर्छ र टर्बाइन घुम्न थाल्छ । गोंगर र बालुवाटारलाई कम्प्युटरको सर्भर (इन्टरनेट) मार्फत जोडिएको छ । अत्याधुनिक विद्युत्‌गृह सबै कम्प्युटरबाट स्वचालित छन् ।

---

आयोजनाको सिभिल, हाइड्रोमेकानिकल  इलेक्ट्रो-मेकानिकल कार्यहरु गत वैशाख १५ गतेअघि नै सम्पन्‍न भएका थिए । सुश्ररुङमा पानी भरी ‘वेट टेस्ट’ (पानीसहितको परीक्षण) कार्य गत असार १३ गते सफलतापूर्वक सम्पन्‍न भएको थियो । माथिल्लो तामाकोसीकै खर्चमा आयोजनाले हालै निर्माण सम्पन्‍न गरेको मुलुककै दोस्रो ठूलो २२०/१३२ केभी देवीघाटर सवस्टेशन (न्यू खिम्ती सवस्टेशन) हुँदै भोलिदेखि तामाकोसीको बिजुली राष्ट्रिय विद्युत् प्रसारण सञ्जालमा आबद्ध हुन लागेको हो । 

गोंगरदेखि सो सबस्टेशनसम्म ४७ किलोमिटर २२० केभी डबल सर्किट प्रसारण लाइन तानिएको छ । त्यसका लागि एक सय २७ वटा ट्रान्समिसन टावरहरु निर्माण गरिएका छन् । हाल ५५ रोपनीमा बनेको उक्त सवस्टेशनबाट करिब १२०० मेगावाट विद्युत् प्रवाह गर्न सकिने आयोजनाले जनाएको छ ।