विद्युत प्राधिकरणमा कुलमान घिसिङ नियुक्त, आज बिहान १० बजे नियुक्तिपत्र दिइने

काठमाडौँ- सरकारले विद्युत प्राधिकरणको कार्यकारी निर्देशकमा कुलमान घिसिङलाई नियुक्त गर्ने निर्णय गरेको छ । सोमबार बसेको मन्त्रिपरिषद्‌ बैठकले  घिसिङलाई नियुक्त गर्ने निर्णय गरेको हो ।

उक्त निर्णयको व्यहोरा मन्त्रिपरिषद्‌को कार्यालयबाट हिजो साँझ साढे ६ बजे ऊर्जा मन्त्रालयमा आइपुगेको ऊर्जा सचिव देवेन्द्र कार्कीले बताए । 'मन्त्रालयमा हिजो साँझ निर्णयको व्यहोरा आइपुगेको छ' सचिव कार्कीले इकागजसँग भने 'घिसिङलाई आज बिहान १० बजे नियुक्तिपत्र दिइनेछ ।'

---

साविकका कार्यकारी निर्देशक हितेन्द्रदेव शाक्यलाई जल तथा ऊर्जा आयोगको सचिवालयमा विशिष्ट श्रेणीमा नियुक्ति गर्ने निर्णय पनि मन्त्रिपरिषद्‌ गरेको छ । शाक्यलाई खाइपाइ आएको सेवा सुविधामा कटौती नहुने गरी उनले गर्नुपर्ने कार्यदेशसमेत उल्लेख गरी आयोगमा सरुवा गरिएको हो ।