ट्रिपिङ समस्या छिट्टै अन्त्य हुन्छ- कुलमान

बुटवल - नेपाल विद्युत प्राधिकरणका कार्यकारी निर्देशक कुलमान घिसिङले ट्रिपिङ समस्याको अन्त्य गरी भरपर्दो विद्युत सेवा उपलब्ध गराउने बताएका छन् । विद्युत प्रशारण लाइन तथा सब स्टेशनहरूको समस्याका कारण अहिले देखिएको विद्युत ट्रिपिङलाई छिट्टै अन्त्य गरिने उनले बताए ।

शनिबार बुटवलमा पत्रकारहरूसँग कुरा गर्दै उनले बन्न लागेका सबस्टेसन सम्पन्न भएलगत्तै प्रशारण लाइनहरूको समेत स्तरोन्नती गरी भरपर्दो विद्युत सेवा उपलब्ध गराउँदै प्रयोगमा प्रोत्साहन गरिने उल्लेख गरे । उत्पादन भएका विद्युतलाई सकेसम्म नेपालभित्रै उपभोग गर्ने रणनीति अनुसार उद्योगहरूले मागेजति विद्युत उपलब्ध गराइने उनले बताए । उद्योग, विद्युतीय सवारीको प्रयोग तथा खानाप काउन इन्डक्सन चुल्होको प्रयोगलाई प्रोत्साहन गर्नेगरी शुल्कमा समेत छुटका व्यवस्थालाई जोड दिइने उनले बताए ।

---

रुपन्देही, परासी क्षेत्रमा मागअनुसारको विद्युत उद्योगलाई दिन नसकिएको भन्दै उनले यो समस्या छिटै समधान हुने बताए। सबस्टेसन निर्माण र केही ट्रान्समिसन लाइन विस्तार भइरहेकाले अहिले परिक्षणस्वरूप भारतमा विद्युत बिक्री गरिएको उनको भनाइ छ । ‘नेपालको विद्युत सबै यहाँ खपत गर्ने र बाँकी रहे मात्र बिक्री गर्ने लक्ष्य हो,' उनले भने । अहिले उत्पादन भइरहेको विद्युत खपत नभएकाले उनले नागरिकहरूलाई विद्युतको प्रयोग गर्न पनि आग्रह गरे । उनले उद्योगीहरूलाई परेको ट्रंक लाइनको विषय पनि छिटो समधान हुने बताए ।