विद्युत् प्राधिकरणका पूर्व उपकार्यकारी निर्देशक रविन्द्रबहादुर श्रेष्ठको निधन

काठमाडौं : नेपाल विद्युत् प्राधिकरणका पूर्व उपकार्यकारी निर्देशक रविन्द्रबहादुर श्रेष्ठको ७३ वर्षको उमेरमा निधन भएको छ ।

नेपालको जलविद्युत् क्षेत्रमा ‘टावरिङ पर्सन्यालिटी’ (विशाल व्यक्तित्व) का रुपले चिनिने श्रेष्ठको उपचारका क्रममा अस्ति पुस ६ गते काठमाडौंमा निधन भएको हो ।

---

जलविद्युत् भन्नेबित्तिकै विदेशीले आएर बनाउनुपर्छ भन्ने मानसिकता कायम रहेका बेला श्रेष्ठले पुवा, चिलिमे र मोदीजस्ता आयोजना आफैले डिजाइन गरी निर्माणको नेतृत्व लिएका थिए । चिलिमेको सफल निर्माणपछि स्वदेशी लगानीमा माथिल्लो तामाकोसी (४५६ मेगावाट) बन्न सम्भव भएको हो । 

स्वदेशमै सस्तो र गुणस्तरीय विद्युत् उत्पादन गर्नुपर्छ र भारतीय विद्युतको जगजगीलाई हटाउनुपर्छ भन्ने धारणा राख्ने श्रेष्ठले जलविद्युतसम्बन्धी विभिन्न लेख, टिप्पणी प्रकाशित गर्दै आएका थिए ।

कोभिड–१९ अघि आफ्नी छोरी डा. आस्मालाई भेट्न गत फेब्रुअरीमा अस्ट्रेलिया पुगेका श्रेष्ठ लकडाउन र अन्तर्राष्ट्रिय उडान ठप्प भएपछि पाँच महिना उतै रोकिएका थिए । दुई महिनाअघि उनी स्वदेश फर्केका थिए ।