काठमाडौं - श्रम तथा रोजगार कार्यालयले नेपाल विद्युत् प्रँधिकरण कर्मचारी संघको अध्यक्ष जनार्दन भट्टराईसमेत कार्य समितिलाई विधान संशोधन र नयाँ कार्य समितिका सम्बन्धमा स्पष्टीकरण सोधेको छ । 

कार्यालयले स्पष्टीकरणमा ट्रेड युनियन ऐन, २०४९ (२०७२ को संशोधनसहित) को दफा १०(२) मा व्यवस्था भएबमोजिम ट्रेड युनियन विधान संशोधन गरिएको हो होइन भनी प्रश्न सोधेको छ । ‘पछिल्लो समयमा गरिएको अधिवेशन तथा निर्वाचनको सम्बन्धमा के कसो भएको हो ? यो पत्र प्राप्त भएको मितिले सात दिनभित्र लिखित जवाफ पेश गर्नु हुन निर्देशानुसार अनुरोध छ,’ स्पष्टीकरण पत्रमा छ । 

---

संघका केही पदाधिकारीहरुले उक्त कार्यालयमा संघको विधान अवैधानिक तवरले संशोधन गरी आफू खुशी अधिवेशन गरिएको भन्दै त्यसलाई खारेज गर्न श्रम कार्यालयमा उजुरी दिएका थिए । 

महाधिवेशनको परिणामलाई बहिष्कार गरेका इन्द्र न्यौपाने, गंगा भण्डारी, महेश्वर दत्त पनेरुलगायतका उम्मेदवारहरुले श्रम तथा रोजगार कार्यालयमा उजुरी दिएका हुन् ।