कुलेखानीका तीनवटै विद्युतगृहबाट पूर्ण उत्पादन

मकवानपुर : जाडो मौसम सुरुवातसँगै विद्युत् खपतमा बढ्दो माग पूरा गर्न कुलेखानीका तीनवटै विद्युतगृहबाट जडित क्षमताअनुसार विद्युत् उत्पादन भएको छ । 
कुलेखानी प्रथमबाट ६० मेगावाट, दोस्रोबाट ३२ र तेस्रोबाट १४ गरी कुल एक सय ६ मेगावाट विद्युत् उत्पादन गरी केन्द्रीय प्रसारणमा जोडिएको छ । कुलेखानी पहिलोले उत्पादन गरेपछि त्यसैको पानीबाट दोस्रो र तेस्रोले बिजुली उत्पादन गर्छ ।      
कुलेखानीबाट उत्पादित विद्युत् अहिले काठमाडौँ, पोखरा, विराटनगर, नेपालगञ्ज, झापा, भैरहवा, जनकपुर र महेन्द्रनगरमा आपूर्ति भइरहेको कुलेखानी पहिलो जलविद्युत् केन्द्रका प्रमुख धीरेन्द्र चौधरीले बताउनुभयो । 

 

---

यसैगरी मकवानपुरको इन्द्रसरोवर गाउँपालिका—१ स्थित इन्द्रसरोवर जलाशयमा अहिले पानीको सतह भरिन करिब साँढे पाँच मिटर उचाइ बाँकी रहेको कुलेखानी पहिलो जलविद्युत् केन्द्रको नियन्त्रण कक्षका प्रमुख रामकुमार चौधरीले जानकारी दिनुभयो ।     
यता प्राधिकरणको प्रणाली सञ्चालन विभागका प्रमुख सुरेश भट्टराईले प्रणालीको आवश्यकताअनुसार कुलेखानीका विद्युत् गृह सञ्चालन भएको बताए । ‘सुख्खा मौसम सुरु भयो, प्रणालीको आवश्यकता अनुसार कुलेखानी सञ्चालन गर्नुपर्ने हुन्छ,’ भट्टराईले शुक्रबार इकागजसित भने ।
उनका अनुसार यतिखेर निजी र प्राधिकरण गरी प्रणालीमा नौ सय ५० मेगावाट बिजुली उपलब्ध छ । दिउँसोका लागि भारतबाट आयात नगण्य हुने गरेको छ भने बेलुकीको अत्यधिक खपत समय (पिक) माए एक सय ५० मेगावाटसम्म आयात हुने गरेको छ । 
यस्तो पिकको अवधिक एक, डेढ घण्टा मात्र हुने उनले बताए । पिकमा विद्युत् माग १३ सय मेगावाटसम्म पुग्ने गरेको भट्टराईले बताए । 
(रासस)