पेट्रोलियम पदार्थ मूल्यवृद्धि विरुद्ध आन्दोलनको नेतृत्व गर्दै दुई नेतृ

काठमाडौँ– सरकारले एकोहोरो पेट्रोलियम पदार्थको मूल्य वृद्धि गर्न नेपाल आयल निगमलाई प्रोत्साहित गरेको भन्दै दुई महिला नेतृले त्यसविरुद्ध आन्दोलनको नेतृत्व गर्ने भएका छन् । अनेरास्ववियूकी अध्यक्ष सुनिता बराल र अनेरास्ववियू (क्रान्तिकारी)की अध्यक्ष पञ्चा सिंहले छुट्टाछुट्टै आन्दोलनको नेतृत्व गर्ने घोषणा गरेका छन् । 

सिंहको मातृ पार्टी माओवादी केन्द्र अहिले सरकारमा छ । अर्थमन्त्री जनार्दन शर्माको समूह निकट भनेर चिनिएकी सिंहले सरकार विरुद्ध आन्दोलनको घोषणा गरेकी हुन् । 

---

त्यस्तै, एमालेको भ्रातृ संगठन अनेरास्ववियूकी अध्यक्ष सुनिता बरालले पनि चुहावट नियन्त्रण, करमा सहुलियतमार्फत् उपभोक्ता मूल्यमा सहुलियत दिनुपर्नेमा उल्टै एकोहोरो मूल्य वृद्धि गरेर जनतामाथि पीडा थपेको बताएकी छिन् । बरालकै मातृ पार्टी नेकपा एमालेका नेता समेत रहेका तत्कालीन अर्थमन्त्री डा. युवराज खतिवडाले कोभिड–१९ महामारीमा इन्धनको अन्तर्राष्ट्रिय बजार मूल्य घटिरहेको र भारतमा भन्दा कम मूल्यका कारण उता तस्करी हुनसक्ने भन्दै बजेटमार्फत् पेट्रोल र डिजेलमा प्रतिलिटर १०–१० रुपैयाँ भन्सार महशुल बढाएका थिए । 

बरालले यो जनताप्रति अनुत्तरदायी सरकारले गरेको पेट्रोलियम पदार्थको मूल्यवृद्धि विरुद्ध निर्णायक आन्दोलन गर्ने बताएकी छिन् । 

अहिले भारतको तुलनामा नेपालमा पेट्रोलियम पदार्थ महँगो छ । भारत सरकारले भने हालै मात्र पेट्रोलमा ८ र डिजेलमा ६ रुपैयाँ (भारु) अन्तःशुल्क घटाएको छ । अहिले नेपालको सीमावर्ती भारतीय बजारमा पेट्रोलियमको मूल्य सस्तो भएको छ । 

नेपाल आयल निगमले वैशाख ३० मा सम्पन्न स्थानीय निर्वाचन यता दुई पटकमा १०–१० रुपैयाँ गरी पेट्रोल र डिजेलमा प्रतिलिटर २०–२० रुपैयाँ मूल्य बढाएको छ । त्यस्तै, खाना पकाउने ग्यासको मूल्य जेठ ८ मा २०० रुपैयाँ प्रतिसिलिण्डरले वृद्धि गरी १८०० रुपैयाँ पुर्‍याइएको छ । 

चालु आर्थिक वर्षमा मात्रै डिजेलको मूल्यमा ४६.५ प्रतिशत, पेट्रोलमा ४०.६ प्रतिशत र ग्यासमा २४ प्रतिशतले मूल्य बढेको छ ।