धरानको बजेट एक अर्ब ६८ करोड ५८ लाख

सुनसरी - सुनसरीको धरान उपमहानगरपालिकाले आगामी आर्थिक वर्ष २०७९/८० का लागि एक अर्ब ६८ करोड ५८ लाख २३ हजार बजेट, नीति तथा कार्यक्रम शुक्रबार सार्वजनिक गरेको छ ।

धरानको ११औँ नगरसभामा उपमहानगरका उपप्रमुख अइन्द्रविक्रम बेघाले बजेट प्रस्तुत गरेकी हुन् । कूल बजेटमध्ये चालुतर्फ ८३ करोड ३७ लाख ७२ हजार ४४२ र पूँजीगतर्फ ८१ करोड ९५ लाख ५० हजार ५५८ र वित्तीय व्यवस्थातर्फ तीन करोड २५ लाखको बजेट विनियोजन गरिएको उनले बताए । 

---

आन्तरिक राजस्वबाट २५ करोड, संस्थागत आन्तरिक अनुदान  पाँच करोड २० लाख, संघीय सरकारबाट ८३ करोड चार लाख, प्रदेश सरकारबाट तीन करोड ५० लाख ७० हजार, संघीय राजस्व बाँडफाँटबाट २० करोड ५३ लाख ४५ हजार, प्रदेश राजस्व बाँडफाँटबाट २० करोड र अपुग हुने ११ करोड ३० लाख आठ हजार नगद मौज्दात परिवर्तनबाट स्रोत व्यवस्थापन गरिने उपप्रमुख बेघाले बताए । 

धरान उपमहानगरले खानेपानी, पूर्वाधार विकास, पर्यटन, कृषि, शिक्षा स्वास्थ्य तथा सामाजिक विकास र विपद् व्यवस्थापनलाई प्राथामिकतामा राखेर बजेट विनियोजन गरेको उपप्रमुख बेघाले जानकारी दिए । 

धरानका २० वटै वडाहरूमा प्रशासनिकतर्फ दुई करोड ५० लाख र कार्यक्रम तथा पूँजीगततर्फ २९ करोड रकम विनियोजन गरिएको छ । सहरी योजना तथा भौतिक पूर्वाधार विकासका लागि  २९ करोड १० लाख र शिक्षा युवा तथा खेलकुदतर्फ ४० करोड ९७ लाख विनियोजन गरिएको छ ।

स्वास्थ्यतर्फ रु चार करोड दुई लाख, सामाजिक विकासतर्फ पाँच करोड ८२ लाख २३ हजार, आर्थिक विकासतर्फ दुई करोड ७२ लाख तथा वन वातावरण ऊर्जा तथा विपद् व्यवस्थापनतर्फ एक करोड ६८ लाख बजेट विनियोजन गरिएको बेघाले बताए । रासस