तिनाउ नदीमा सम्झौता भएको १२ वर्षपछि बन्यो पुल

बुटवल । रुपन्देहीको देवदह–तिलोत्तमा–मोतिपुर–लुम्बिनी सडकखण्डमा बनेको पक्की पुलको उद्घाटन भएको छ । गृहमन्त्री बालकृष्ण खाणले पुलको शनिबार एक समारोहका बीच उद्घाटन गरे । 

सडक डिभिजन बुटवलमार्फत निर्माण सम्पन्न पुल उद्घाटन गर्दै खाणले ३ वर्षमा सम्पन्न गर्नुपर्ने पुललाई विश्वविद्यालय निर्माण गरे जति समय लागेको बताए । तिनाउ नदीमा १२ वर्षपछि निर्माण सम्पन्न भएको पुलको चर्चा गर्दै मन्त्री खाणले वेल सिंकिङ प्रविधिमा निर्माण सुरु भएको पुल आधाआधीमै कंक्रिटको ढलान भेटिएपछि डिजाइन बदल्नु परेकाले लामो समय रोकिएर निर्माण गरिएको बताए । ’यो पुल देशकै अनुपम उदाहरण र नमुना पुल बनेको छ,’ उनले भने, ’यसको अध्ययन र डिजाइन परिवर्तनको छलफलले लामो समय लिँदा काम रोक्नुपर्‍यो ।’

---

उनले यस पुलको अध्ययन तथा छलफलका क्रममा आफूले ओभरसेयर सरहको ज्ञान हासिल गरेको भन्दै अन्य स्थान तथा निर्माण व्यावसायिक लागि पनि तिनाउ नदी पुल सिकाइको पक्ष बनेको बताए । एलिट कन्स्ट्रक्सन प्रालि काठमाडौंले निर्माण ठेक्का लिएको पुलको आधा भागमा ढुंगा भेटिएपछि निर्माण पूरा गर्न नसक्ने बताएको खाणले जानकारी दिए ।

उनले लामो समयपछि त्रिभूवन विश्वद्यिालयको इन्जिनियरिङ इन्स्टिच्युटका प्राज्ञको टोलीले अध्ययन गरी नक्सा परिवर्तन गर्ने सुझाव दिएपछि मात्र भौतिक पूर्वाधारले स्वीकृति दिई सडक डिभिजनले पुनः काम गरेको जनाए । उनले यस पुल निर्माणले बुद्ध सर्किट जोड्ने गरी मानिसको आवतजावत तथा ४ नगरको भाइचारामा थप टेवा पुग्ने बताए । साथै आन्तरिक पर्यटन प्रवर्द्धन गर्न पनि पुलले महत्वपूर्ण भूमिका खेल्ने उनको भनाइ छ ।

साथै गृहमन्त्री खाँणले तिलोत्तमा हुँदै मोतीपुर हिँड्ने मानिसलाई पुलले सहज बनाए पनि सुरक्षाका दृष्टिकोणले खतरा हुन सक्ने भएकाले तत्कालै प्रहरी बिट राखी सुरक्षा दिन लुम्बिनी प्रदेश प्रहरी प्रमुखलाई निर्देशनसमेत दिएका छन् । उनले हाललाई सामान्य तरिकाले बारेर बिट बनाउने र काम सुरु गरिहाल्ने भन्दै पुल निर्माण भएको वारिको तिलोत्तमा नगरपालिका र पारिको बुटवल उपमहानगरपालिकामध्ये एकले प्रहरीका लागि २ कोठे आवास तथा शौचालय निर्माण गरी सहयोग गर्न आग्रह गरे ।

२०६७ असार २५ गते ठेक्का सम्झौता भएको उक्त पुल ११ मिटर चौडाई तथा १ सय ८५ मिटर लामो छ । कुल १३ करोड ८३ लाख १५ हजार ३ सय ७८ रुपैयाँ लागत अनुमान गरिएको पुल ११ करोड ७२ लाख ८८ हजार ९ सय ७ रुपैयाँमा ठेक्का सम्झौता भएको सडक डिभिजन कार्यालय बुटवलका इन्जिनियर अशोक पौडेलले बताए । उनका अनुसार पुल निर्माण सम्पन्न मिति यही असार २५ गतेका लागि तोकिएको थियो ।