ऋण लिने हो ? यी बैंकमा सस्तो छ ब्याज

काठमाडौं : वाणिज्य बैंकहरुले प्रकाशित गरेको चालु आर्थिक वर्षको पहिलो त्रैमास (साउन-असोज)को वित्तिय विवरणका आधारमा तय गरेको आधार दर अनुसार कर्जामा सबैभन्दा सस्तो ब्याजदर हुने बैंकहरुमा राष्ट्रिय वाणिज्य बैंक, एनआइसी एसिया बैंक, स्ट्याण्डर्ड चार्टर्ड, नबिल र नेपाल बैंक पहिलो पाँचमा देखिएका छन् ।

बैंकहरुसँग स्रोतको उपलब्धता बढेसँगै सबै बैंकको आधारदर घटेको छ । सञ्‍चालनमा रहेका २७ बैंकको आधार दर १० प्रतिशतभन्दा कम छ । हरेक त्रैमासिकमा आधारदर पुनरावलोकन हुने गरेकोमा यस पटकका लागि सबै बैंकको आधार दर एकल अंकमा देखिन्छ ।

---

सबैभन्दा प्रतिस्पर्धी पहिलो पाँच बैंकमध्य सबैभन्दा प्रतिस्पर्धी सरकारी स्वामित्वको राष्ट्रिय वाणिज्य बैंकको आधार दर ५.७४ प्रतिशत रहेको छ । त्यस्तै एनआइसी एसिया बैंकले ६.५० प्रतिशत, स्ट्याण्डर्ड चार्टर्डले ६.६१ प्रतिशत, नबिल बैंकले ६.६८ प्रतिशत र नेपाल बैंकले ६.८१ प्रतिशत आधार दर तय गरेका छन् ।

आधार दरमा १ देखि २ प्रतिशत प्रिमियम जोडेर बैंकहरुले ब्याजदर तय गर्छन् । आधार दर प्रकाशन गर्नुपर्ने व्यवस्थासँगै सेवाग्राहीले बैंकसँग ऋणको ब्याजदरमा ‘नेगासिएट’ गर्न सक्छन् । बैंक्हरुले आधार दर तय गर्दा उनीहरुको निक्षेप संकलन लागतमा ओभरहेड खर्चको ८० प्रतिशत साथै ०.७५ प्रतिशत नाफा राखेर तय गर्छन् । त्यस्तै, सरकारी ऋणपत्रमा बैंकहरुले प्राप्त गर्ने प्रतिफल निक्षेपमा दिने ब्याजदर भन्दा कम छ भने त्यो कमी पनि उनीहरुले आधार दर तय गर्दा नै जोड्ने गर्छन् ।

सबैभन्दा उच्च आधार दर हुने बैंकहरुमा नेपाल बंगलादेश बैंकको ९.८७ प्रतिशत, सिभिल बैंकको ८.८८ प्रतिशत, सिटीजन्स बैंकको ८.८१ प्रतिशत, सेञ्चुरी बैंकको ८.६८ प्रतिशत र एनसीसी बैंकको ८.६३ प्रतिशत रहेको छ । कोभिड-१९ को संक्रमणका कारण लकडाउन र निषेधाज्ञाका कारण व्यवसायिक गतिविधि सुस्त छन् । जसका कारण पहिलो त्रैमासमा कर्जाको मागमा गत वर्षको तुलनामा ४० प्रतिशतभन्दा बढीले गिरावट आएको थियो ।

यद्यपि कार्तिक महिनादेखि ऋण प्रवाहमा सुधार आएको नेपाल बैंकर्स संघका अध्यक्ष भुवनकुमार दाहालले बताए । ‘गत वर्ष कार्तिक महिनासम्म बैंकहरुबाट १ खर्ब २५ अर्ब रुपैँया कर्जा प्रवाह भएकोमा अहिले पनि सोही हाराहारीमा पुगेको छ,’ उनले भने, ‘कर्जा वृद्धिदर स्थिर भएपनि पनि कार्तिकबाट ऋणको माग बढ्न थालेको छ ।’

कोभिड संक्रमण न्यूनीकरणका लागि कार्यस्थल सुरक्षा सम्बन्धि मापदण्ड जारी भएको साथै कोभिडविरुद्धको खोप आउने खबरसँगै व्यवसायिक क्षेत्रमा सामान्य उत्साह आएको छ ।कोभिडका कारण मागमा कमी, व्यवसायिक गतिविधिमा कठिनाइका कारण कतिपय साना, मझौला व्यवसाय बन्द हुन सक्ने भन्दै सरकारले उनीहरुलाई बचाउन नेपाल राष्ट्र बैंकले सहुलियतपूर्ण पुनःकर्जा स्वरुप दुई अर्ब रुपैँया उपलब्ध गराएको छ भने सरकारले व्यवसायिक निरन्तरताका लागि ५० अर्ब रुपैँयाको सहुलियत कर्जा कोष सञ्चालनमा ल्याएको छ ।

सस्तो कर्जाको उपलब्धता भए पनि व्यवसाय गर्न सहज वातावरण नहुँदा कर्जाको माग भएको थिएन । कर्जाको मागमा कमी र सस्तो कर्जाको उपलब्धता अधिक भएपछि बैंकहरुले आफ्ना नियमित कर्जाका विभिन्न स्कीमहरुमा समेत ब्याजदर घटाएका हुन् । उनीहरुले निक्षेपमा पनि ब्याजदर कम गरेका छन् । जसका कारण बैंकहरुको आधार दर एकल अंकमा राख्‍न सम्भव भएको हो ।