अर्थ / बाणिज्य

सर्वोत्तमको गोल्डेन सेयर प्रकरण

ढुंगानालाई निलम्बन गर्नुको कारण देखाउन सर्वोच्चको आदेश

इकागज |
असोज ३, २०७८ आइतवार १६:३३ बजे

फाइल फोटो

काठमाडौं - भीष्मराज ढुंगानालाई धितोपत्र बोर्डको अध्यक्षबाट निलम्बन गर्नुको कारण देखाउन सर्वोच्च अदालतले आदेश दिएको छ । ढुंगानाले आफ्नो निलम्बनविरुद्ध  प्रधानमन्त्री तथा मन्त्रिपरिषद्को कार्यालयलाई विपक्षी बनाउँदै भदौ २३ गते सर्वोच्च अदालतमा रिट दायर गरेका थिए । उनको रिटको सुनुवाइ गर्दै भदौ २९ गते सर्वोच्चका न्यायाधीश कुमार रेग्मीको एकल इजलासले सरकारका नाममा कारण देखाउ आदेश जारी गरेको हो ।

सर्वोच्चले अन्तरिम आदेशबारे छलफल गर्न दुवै पक्षलाई बोलाएको छ । बुक बिल्डिङ विधिबाट धितोपत्रको सार्वजनिक निष्कासन गर्ने प्रक्रियामा रहेको सर्वोत्तम सिमेन्टको सेयर आफ्नी छोरी रेविका ढुंगानाले खरिद गरेको भेटिएपछि उनी विवादित थिए ।


यस विषयमा अध्ययन गर्न अर्थ मन्त्रालयले आन्तरिक रूपमा बनाएको छानबिन समितिपछि गएको भदौ १६ गते बसेको मन्त्रिपरिषद् बैठकले ढुंगानालाई निलम्बन गर्दै छानबिन गर्न उच्च अदालतका पूर्वन्यायाधीश अनन्तराज डुम्रेको अध्यक्षतामा तीन सदस्यीय जाँचबुझ आयोग गठन गरिसकेको छ । विज्ञ सदस्य प्रा. नारायणप्रसाद पौडेल, कानुन आयोगका सहसचिव अर्जुनकुमार खड्का सदस्य छन् ।


Author

थप समाचार
x