वित्तीय स्थिति कमजोर : महँगी बढ्यो, रेमिट्यान्स घट्यो, शोधनान्तर घाटा ३८ अर्ब

काठमाडौँ - चालु आर्थिक वर्षको पहिलो महिनामा मुलुकको आर्थिक तथा वित्तीय स्थिती कमजोर देखिएको छ । नेपाल राष्ट्र बैंकले सार्वजनिक गरेको देशको वर्तमान आर्थिक तथा वित्तीय स्थितिअनुसार साउनमा अर्थतन्त्रका अधिकांश सूचक कमजोर छन् । 

साउनमा रेमिट्यान्स आप्रवाह १८.१ प्रतिशतले घटेको छ । रेमिट्यान्स फ्लो ७५ अर्ब ९३ करोड रुपैयाँमा सीमित भएको छ । अघिल्लो वर्ष वैदेशिक रोजगारीमा जाने नेपालीको संख्या घटेपछि त्यसको प्रभाव रेमिट्यान्समा पुगेको हो । अघिल्लो वर्ष ९९.२ प्रतिशतले घटेको थियो । 

---

मुलुकमा भित्रिने रकमको तुलनामा बाहिरिने रकमको अनुपातमा वृद्धि भएपछि शोधनान्तर स्थिति घाटामा छ । शोधनान्तर स्थिति ३८ अर्ब ७५ करोड रुपैयाँ घाटामा छ । अघिल्लो वर्ष यो ५१ अर्ब ४६ करोड रुपैयाँ बचतमा थियो । 

विदेशी विनिमय सञ्‍चितिमा समेत असर पुगेको छ । असारसम्म विनिमय सञ्‍चिति १३ खर्ब ९९ अर्ब रुपैयाँ थियो । तर साउनमा यो ३.२ प्रतिशतले घटेर १३ खर्ब ५३ अर्ब रुपैयाँमा झरेको छ । 

आयातित कच्चापदार्थमा आधारित वस्तुको निर्यात बढ्यो
साउनमा आयातित कच्चापदार्थमा आधारित वस्तुको निर्यात बढेको छ । पास आयल, सोयाबिन आयल, धागो, जुस, पिना जस्ता नेपालमा खासै खेती नहुने वस्तुबाट उत्पादित वस्तुहरूको निर्यातले कुल निर्यातलाई बढाएको छ । तर नेपालमै उत्पादनको सम्भावना बोकेको र विगतमा प्रमुख निर्यातयोग्य वस्तुको स्थानमा रहेका अलैंची, आयुर्वेदिक औषधी, जडिबुटी, जस्ता वस्तुको निर्यातमा कमी आएको छ । 

साउनमा आयात पनि ७५.७ प्रतिशतले बढेको छ । एक खर्ब ५० अर्ब रुपैयाँ बराबर वस्तुको आयात भएको छ । कच्चा सोयाबिन तेल, एमएस बिलेट, सुनको आयात बढेको छ भने रासायनिक मल, सिमेन्ट, सुर्ती, हवाइजहाजका पार्टपूर्जाको आयातमा कमी आएको छ । 

पोहोर साउनमा २२.२ प्रतिशतले घटेको व्यापार घाटा यसपाली ७०.६ प्रतिशतले बढेको छ । 

महँगी बढ्यो
साउनमा वार्षिक विन्दुगत उपभोक्ता मुद्रास्फिती (महँगीदर) ४.७५ प्रतिशत छ । अघिल्लो वर्षको साउनमा महँगीदर ३.४९ प्रतिशत थियो । 

गत वर्षको साउनको तुलनामा घ्यू तथा तेलको मूल्यवृद्धि २९.०७ प्रतिशत छ । थोक मुद्रास्फिती ४.२५ प्रतिशत छ । गत वर्षको साउनमा यो ७.३३ रहेको नेपाल राष्ट्र बैंकले जानकारी दिएको छ ।